ائتدی بو فلک هر کسه بیر طؤور یامانلیق،
سد حئیف، کئچن گۆن!
شۆکر ائیلهدیک الله-ا یئتیشدیکجه زیانلیق،
افسورده بیز اولدوق.
هر بیر ایش اۆچون خاتیمه بخش اولدو بو آفاق،
اولدوق یئنه ممنون.
چالدی بیزه بیر اؤزگه سیاق ایله فؽریلداق،
غملی گۆنه قالدیق.
نه رحم بیلر، شرم قانار، آغلاماق آنلار،
بؤیله فلک اولماز!
یوخ بؤیله ایکی دیللی، یامان اۆزلو جفاکار،
بیر ذرّه اوتانماز!
وئردی بو هامی قونشولارا صنعت و دؤولت،
دۆنیا، سنه لعنت!
سسلندی، گئدک سیز یاتین حمّامده راحت،
بیجادی بو زحمت!
اؽسلام اوشاغی یاتسین آیاغیندا فلققه،
بو نؤعدی تعلیم.
وورسون بولارین باشینا هم میرزه ترققه،
ائیلین اونو تکریم.
ائی وای، بو فلک قویدو بیزی لؤقمهیه حسرت،
قالدیق بیز آدامسیز!
وئرمز دخی بیر چؤرک تاپماغا فۆرصت،
گئت، یاتگیله شامسیز!
اؤز بیلدیگینی قؽلدی مۆسلمانلارا دؤران،
ال ایشدن اۆزولدو.
چاقچاق باشین آغریتدی، کئفین چکدی دییرمان،
اؽش هجوه دۆزولدو.
بو چرخی-سیتمکارین آمان مسخرهسیندن!
باعیث، بالان اؤلسون!
باخمیش بو مۆسلمانلارا غم پنجرهسیندن،
چرخین اۆزو دؤنسون!
اوّل بو فلک جۆملهدن اگمیشدی داماغی،
غم کاسهسی داشدی.
آخیردا بیزیم باشیمیزا ووردو چاناغی،
سو باشدان آشدی.
بیر روس گؤرنده اولوروق خوار یانیندا،
قوزو، کئچیییک بیز.
کئچمز سؤزوموز بیر پولا سردار یانیندا،
چۆنکی نچیییک بیز؟!
تانری بونا شاهید –
قوزو، کئچیییک بیز...
اؽلک دفعه «مولّا نصرالدّین» ژورنالیندا (4 آوقوست، ۱۹۰۶، № 18) «مولّا نصرالدّین» ایمضاسی ایله چاپ اولونموشدور.