ترپنمه آماندیر بالا، غفلتدن آییلما!
آچما گؤزونو، خوابی-جهالتدن آییلما!
لایلای، بالا، لایلای!
یات، قال دالا، لایلای!
آلدانما آییقلیقدا فراغت اولا، هئیهات!
غفلتده کئچنلر کیمی لذّت اولا، هئیهات!
بیدار اولانین باشی سلامت اولا، هئیهات!
آت باشینی یات، بستری-راحتدن آییلما!
لایلای، بالا، لایلای!
یات، قال دالا، لایلای!
آچسان گؤزونو رنج و مشقّت گؤرهجکسن،
میلّتده غم، اۆمّتده کۆدورت گؤرهجکسن،
قؽلدیقجا نظر میلّته حئیرت گؤرهجکسن،
چک باشینا یورغانینی، نیکبتدن آییلما!
لایلای، بالا، لایلای!
یات، قال دالا، لایلای!
بیر لحظه آییلدینسا، قوتار جانینی یوخلا،
آت تیریاکینی، مئیل ائله قلیانینی، یوخلا،
اینجینسه ساغین، وئر یئره سول یانینی، یوخلا،
ایللرجه شۆعار ائتدیگین عادتدن آییلما!
لایلای، بالا، لایلای!
یات، قال دالا، لایلای!
گؤز نورودور اویقو، اونو دور ائتمه گؤزوندن،
یول وئرمه مبادا چؽخا بیر لحظه سؤزوندن،
اما ائله برک یوخلا کی، حتی گئت اؤزوندن،
آفاقی توتان شور و قیامتدن آییلما!
لایلای، بالا، لایلای!
یات، قال دالا، لایلای!