آنامیز بیردیرسه وطن ده بیردیر
نه آنا، نه وطن ایکی اولامماز.
غۆربتده تاپدیغین خئییر ده شردیر
قلبین بو خئییردن ایسیقلانامماز.
غۆربتین خئیرینه آی آلدانان کس،
وطنین شرّینه کیم اورتاق اولسون؟
وطنی اؤزونه غۆربت سانان کس
سنین آنان اؤلوب، باشین ساغ اولسون!
هامی هشیردهدیر گۆزرانییلا
جئیران بئلیندهدیر بیر لوخما اپپک.
آنا یارالییسا، اوغول قانییلا
اونون یارالاری یویولسون گرک.
یئدیگیم، ایچدیگیم درددی، غمدیسه
نئیلهمک؟ بو اوجاق، بو یورد منیمدیر.
گؤز یاشیم آخان یئر غۆربتیمدیسه،
قانیم آخان یئرلر، اؤز وطنیمدیر.
هاردا اولورسان اول، قلبین فهمی وار
سنی تورپاق چکر، سنی قان چکر.
غۆربتده وطنچین گؤزو یاشلیلار
وطنین نامینه جانیندان کئچر.