غزل

'گل-گل' دئیه هیجرینده کامان تک مله‌دیم من،
بیر عؤمرو سنین عشقینه قوربان ائله‌دیم من.
آسوده طیفیلدین، نه غمین واردی، نه دردین،
دردیمله سنین گؤزلرینی سۆرمه‌له‌دیم من.

حیسّیم سنه 'گل-گل' دئدی، عقلیم دئدی 'گئت-گئت'
بو قانلی دؤیوشدن منه ایمداد دیله‌دیم من.

عشقیم ده قاخینج اولدو منیم باشیما هر گۆن،
بیر عشقین اوجوندان نه قدر طعنه یئدیم من.
اؤز حیسّینی دوستاق ائله‌ین بختیار اولماز،
اؤز عشقیمه، اؤز کؤنلومو زیندان ائله‌دیم من.