نه بیلیدیک بو سئوگینین سونو یوخ،
نه بیلیدیک دۆنیا بئله دؤنهجک.
نه بیلیدیک سئوگی آدلی بو قوناق
ایکیمیزین آرامیزدا اؤلهجک...
اولو سئوگی گؤیدن یئره ائندیمی،
نه دایاندی یولوموزون اۆستونده؟
بو محبّت سویودوقجا سن دئمه
جان وئررمیش قولوموزون اۆستونده.
هر گؤروشه سۆرونوردو آیاقلار...
او چمنلر – بیر باهارلیق سمنی.
دوداقلاری یاندیراندا دوداقلار
اۆرییمیز اۆشویورموش دئمهلی.
ایلنجهلر قویمادی کی گؤز آچاق؛
هر ایستیی بیز بئلهجه بیتیردیک.
پاییز گلدی توی-بایراملا، بیز آنجاق
یارپاق-یارپاق گۆنوموزو ایتیردیک.
شیرین اولدو یالانلارین زهری،
حقیقتی گیزلمیشیک همیشه.
سئوگیلیلر اویاق آچدی سحری.
بیز آخشامی گؤزلمیشیک همیشه...
یوخو گؤردوک... گاه قورخولو، گاه دا شن،
بوغدو بیزی ترددودولر آخاری.
یوخولاردا اللر گؤردوک بیرلشن،
نه یوزدوقسا هیجران اولدو آخیری...
نه بیلیدیک بو سئوگینین سونو یوخ،
نه بیلیدیک دۆنیا بئله دؤنهجک.
نه بیلیدیک سئوگی آدلی بو قوناق
اۆزوموزه باخا-باخا اؤلجک...