آغلاما، تبریزیم، آغلاما

دئمه یوللار اوزاق‌دیر،
آرایا بیر چای دۆشوب؛
وصال کیمین قیسمتی،
بیزه حسرت پای دۆشوب.
بیریمیزه گؤز یاشی،
بیریمیزه توی دۆشوب؛
دانیش، اوجادان دانیش،
سن دیلینی باغلاما.
آغی دئدیین بس‌دی،
آغلاما، تبریزیم، آغلاما

اؤلنلر تورپاغین‌دیر،
بیزه ساغلار قالیب‌دیر.
باخیب کؤکس اؤتورمه‌یه
قارشی داغلار قالیب‌دیر.
بیر گؤزوموز گۆلورسه،
بیری آغلار قالیب‌دیر.
سیل گؤزونون یاشینی
اۆرییمی داغلاما،
آغلاما، تبریزیم، آغلاما

بو تورپاغین اۆستون‌ده
او تای‌لی، بو تایلیییق.
تورپاق کی عؤمور دئییل
نئجه گل‌دی پایلایاق.
نه قدر «قارداش» دئییب
اوزاق‌دان هارایلایاق،
اوجالت حاقین سسینی،
دئ سؤزونو، ساخلاما،
آغلاما، تبریزیم، آغلاما

بلکه بنؤوشه‌میزی
بو نیسگیل، حسرت اییر.
آرازا کؤرپو اۆچون
تورپاق اوغول ایستییر.
سنه ال اوزادیرام،
الیم مفتیله دییر.
سن گۆون اؤز عقلینا
دؤیوشکن، دۆز عقلینا،
آغلاما، تبریزیم، آغلاما

چوخ‌دور دیل پهلوانی،
سؤزده آشیب-داشیریق،
بو گۆناه‌سیز آرازا
نئچه گۆناه قوشوروق.
وطنین اورتاسین‌دا
مفتیله دولاشیریق؛
بیر ده باخ دۆننینه
کیم‌سه‌یه بئل باغلاما.
دور آیاغا، «وطن» دئ،
آغلاما، تبریزیم، آغلاما!..