داغلارا گۆن دۆشوبدور،
آچیل، بنؤوشم، آچیل...
"خالق ماهنیسی"
هاوا یامان سازاقدی،
گۆنش سندن اوزاقدی،
بیر آج قوزو ملهییب
سنه بویلاندی، باخدی،
یومول، بنؤوشم، یومول.
چمنلره ایز دۆشور،
بیر دئییل کی، یۆز دۆشور.
نیه سنین پاییزین
هر چیچکدن تئز دۆشور؛
یومول، بنؤوشم، یومول.
گؤیده بولود گؤرونور،
بولود قارا بۆرونور.
او داغدا بیر دومان وار
سنه طرف سۆرونور؛
یومول، بنؤوشم، یومول...
قالارسان باخا-باخا،
کاغیذ گۆل سندن باها،
آری یامان چوخالیب
گۆلو ده سانجیر داها؛
یومول، بنؤوشم، یومول.
عؤمرون بیرجه هفتهدیر،
عطرین مین جۆر حبدهدیر،
ایندی سئونلر اۆچون
بئش قرنفیل دبدهدیر؛
یومول، بنؤوشم، یومول.
یوم گؤزونو، چن گؤرمه،
واختسیز گلن غم گؤرمه،
دۆنیا یامان قاریشیب،
من گؤرنی سن گؤرمه؛
یومول، بنؤوشم، یومول!...