بو ایپک اؤرتوک آلتدا
زولاقلی دؤشیین
قؽرچین لپهلری وار،
نئچه قادین کۆریینین
نئچه قؽز اۆریینین
لپیرلری وار...
بو چارپایی هوپ-هوپ کیمی
اوخویا بیلیر،
بو چارپایی
تاکسی سایغاجیتک
سایا بیلیر،
قادینلارین آغیرلیغیندان
اونلارین فیراوانلیغینی
دویا بیلیر.
بو چارپایی
قوشا اوووجا بنزر،
دیلنچی اووجونا،
قادینلار پول کیمی
آتیلیرلار بورا؛
چؽرپینیرلار بالیق کیمی
پولاد تورلارینی قؽرا-قؽرا...
بالیشین ایچیندن
غارت اولموش تویوقلارین
لیباسی هؤنکورور.
چارپاییدان دؤشمهیه
ایپک لیباس تؤکولور.
دیواردان جاکوندا گۆلومسونور
چؽلپاق آفرودیتالارین
یالانچی های-کۆیونه،
بو چارپایی آغری چکیر
دئیینه-دئیینه...
جاکوندا قادینا باخیر،
ائله بیل قهقهیله گۆلهجک؛
بو قادین هر شئیدن خبرسیزدیر،
ایندی...
هر شئیی بیلهجک...