منو
آه و زار ائدن سن ایدین
فراق ایله ایشیمی آه و زار ائدن سن ایدین!
یخاین بو قلبیم ائوین، تار و مار ائدن سن ایدین!
سنین یولوندا بلالر قبول ائدن من ایدیم،
منیم خلافیما هیجر اختیار ائدن سن ایدین!
سریشک چشمیمی هر کس گؤره بیلر دردیم،
بو سرّی عالم آرا آشیکار ائدن سن ایدین!
منی بو غم یوکونو چکمه یه روا بیلدین،
سالیب ملامته، هم شرمسار ائدن سن ایدین!
خزان هیجریدن آسوده، وصلدن خوشدل،
فضای کؤنلومو رشک باهار ائدن سن ایدین!
غوبار خاطر غیر اولدوغوم، کدورت ایمیش،
سالیب آیاغا وجودوم غوبار ائدن سن ایدین!
سبب نه الدو کی، پیمان و عهدی سیندیردین؟
وفا و عهده ازل اعتبار ائدن سن ایدین!
بو غملی کؤنلومو گه شاد ائدن وصالین دیر،
غم فراق له، گاهی فیکار ائدن سن ایدین!
گلنده مرغ دیلیم غم چؤلونده پروازه،
خدنگ غمزه ایله هم شیکار ائدن سن ایدین!
دمادم آه چکیب یانمیشام فراقینده،
منی بو رنج و بلایه دوچار ائدن سن ایدین!
توکندی عمر، دریغا، غم فراقینده،
اومید وصله منی انتظار ائدن سن ایدین!
عزیز عالم ایدی ناتوان وصالینده،
چکیب مذلت هیجرانه، خوار ائدن سن ایدین!