قیلدی گولسیتان ترکین

نه الدو بولبوله کیم، قیلدی گولسیتان ترکین؟
اونوتدو گوللرینی، ائتدی آشیان ترکین.

کیم ایله مونس اولوبدور، کیمه سالیب مئیلین؟
روامی دیر ائله مک یار مهربان ترکین؟

کؤنول کی، خار جفادان همیشه نالان دیر،
یارالیدیر، ائله مز ناله و فغان ترکین.

چراغ رؤوشن بزم اومید ایکن، یا رب،
سبب نه اولدو، او مه ائتدی همزبان ترکین.

باخارمی غیری لره چشمی پیر کنعانین؟
ائدیرمی عاشیق اولان یوسیف زامان ترکین؟

سنین فراقینه جانیمدا تاب و طاقت یوخ،
تن فسرده، عزیزا، ائدرمی جان ترکین.

جاهانی ترک ائله مز کیم کی، عاشیق جان دیر،
حیاتدان اوزوب ال، ائیله مز جهان ترکین.

قرار جانیمی ایدی، کسدی جان توانه سینی،
اوزولدو قوت جان ائتدی ناتوان ترکین.