منو
غمینده عمردن بیزاردیر بولبول؟
نه گوللر کیم، غمینده عمردن بیزاردیر بولبول؟
اولوب هر باغبان گولزاره محرم، خواردیر بولبول.
او گول کویینده از بس کی، فغان و ناله‌لر چکدیم،
فغان و ناله مین تاثیری وار، بیماردیر بولبول.
وفاسیز آنلاییب گول عهدینی، اوندان فغان ائیلر،
خزان تاراجینی بیلمیش، عجب هوشیاردیر بولبول.
دریغا کیم، اولوب زاغ و زاغان ییغناغی بو گولشن،
قالیب آواره، هردم حسرت گولزاردیر بولبول.
توتوب هر خار الی بیر گولبون نؤورسته دامانین،
کئچیب ایام عشرت، غصه دن افکاردیر بولبول.
پر و بالی شکسته، ناتوان زار و دلخسته،
یئتیبدیر جانه غمدن، طالب غمخواردیر بولبول.