منو
خوش زبان گئتمه!
خجسته بولبول خوش نطق، خوش زبان گئتمه!
منه ترحم ائله، قویما ناتوان گئتمه!
بو گولشن ایچره، گولوم، نوشوکوفته بیر گولشن،
سنه هنوز دئییل مؤوسیم خزان گئتمه!
من فلک زاده یه رحم قیل، سنی تاری،
قاشین کیمی قدیمی ائله‌ییب کامان گئتمه!
سنین بو گؤزلرینه گؤزلریم اولا قوربان،
بیر ایکی دم منه اول باری همزبان گئتمه!
یئنی نموّ اله ین سروّش، دایان باری،
سریشکیمی قوی ائدیم پایینه روان، گئتمه!
منه کی، گوشۀ چشم ایله بیر نهان باخدین،
تئز اؤلدورر منی بو محنت نهان، گئتمه!
دوشه ایاقدان اول سرو قامتین، بیللاه،
قیامتی گتیرر باشیمه عیان، گئتمه!
بو جسم زاریم اوچون محض روح سن، آخیر،
توتار قرار مگر، روح سیز روان، گئتمه!
ایکی گؤزوم ایشیغی، شاهزاده سیمبریم،
منی ده یولداش آپار، قویما ناتوان، گئتمه!