شوری-عشقین باشیما آخیری سؤودا گتیریر،
بو مشخّصدی کی، عشق عاشقه غوغا گتیریر.
تاری-زۆلفوندو منی بؤیله گیریفتار ائلهییب،
نه گله باشیما، اول زۆلفی-مطرّا گتیریر.
گۆل اۆزون گؤرمک اگر مۆمکون اولایدی بیر دم،
هر زامان گؤرمک اونو نوری-مۆجللا گتیریر.
قاشو گؤز، نووکی-مۆژه فیتنه اۆچون جمع اولموش،
اوخ آتیب، تیغ جکیب، هر بیری دوا گتیریر.
کؤنلومو غارت ائدیر ائیله کی، تاری-زۆلفون،
رومه، سانکی حبشی لشگری-یغما گتیریر.
ناقنین وارمی شعورو بولا آشیق گویین،
اونو مجنونه طرف جذبهی-لئیلا گتیریر.
یوسیفین سانما، دۆباره گؤره یعقوب اۆزون،
مئهر بازارینا گؤر گئتسه، زۆلئیخا گتیریر.
یوسیفی مصرده گر آلدی زۆلئیخا نقده،
نقدی-جان، عاشق اولان، الده مۆهییا گتیریر.
صیدقی-قلب ایله نثار ائتمیش ایدین جان نقدین،
ناتوان، مۆژده بو گۆن، قتلینه فرمان گتیریر