گئجه‌لی-گۆندوزلو

آزادلیغیما شاهید قانیم رنگ‌لی بایراغی
عؤمورلوک باشی اۆسته ساخلایان شاعرم من.
هر ایلین باهارین‌دا وجده گلیب دیلین‌ده
سؤزو شلاله‌لرتک چاغلایان شاعرم من.

ائی جنوب‌لو قارداشیم، دوغرو یول سئچنلرین،
ستتارخان بولاغین‌دان بۆللور سو ایچنلرین،
آزادلیق ووروشون‌دا جانین‌دان کئچنلرین
یاراسینی شعریمله باغلایان شاعرم من.

دوستونون دوستویام من، دۆشمنینین دۆشمنی،
من گئجه‌لی-گۆندوزلو آنیرام هر آن سنی،
گؤزوم‌ده یاش گؤرمسن، قؽناما، قارداش منی،
اۆرییمین گؤزویله آغلایان شاعرم من.