یانیلمارام دئسم کی، آلین ترلی سؤزومله
کؤنوللرده شاعرتک اؤزومه یووا قوردوم.
اؤز ایلک ماهنیلاریمی کؤروک باسا-باسا من
آتامین گور دمیرچی اوجاغیندا یوغوردوم.
یوردومون کئشیینده گئجهلی-گۆندوزلو من
اۆرییمین گؤزویله سفربر کیمی دوردوم.
چالیشیرام وۆقارلا کؤچ زامانی دئییم کی،
ساده شاعر عؤمرومو ویجدانلا باشا ووردوم.
بیر وصال حسرتیله چؽخدیم اوزاق یوللارا
دوستلاردان سهندیمی، شهریاریمی سوردوم.
دۆنن ده یوللاردایدی، بو گۆن ده یوللاردادیر
یورولمایان سؤز اوردوم، قوجالمایان سؤز اوردوم.
سندن دئییر سلیمان، سندن دئیهجک یئنه،
سن ائی منیم وارلیغیم، مقدس آنا یوردوم...