منو
منیم موشتولوغوم
بختیار واهاب‌زاده‌یه
چوخ‌دان‌دیر شاد خبر گلمیر او تای‌دان،
باغریما داغ چکیب آیری‌لیق منیم.
هاچان‌دیر بیر نفر گلمیر او تای‌دان،
باشیما داش تؤکوب آیری‌لیق منیم.
ایللردیر بو آراز قؽراغین‌دا من،
قارداش سوراغین‌دا گزن اولموشام.
واحد وطن، ملّت فراقین‌دا من
دؤزولمز دردلره دؤزن اولموشام.
منه سؤزاراسی "شاعر، بیر بئله
یازماق‌دان نه چؽخار" دئینلر ده وار.
اوردا زندان‌دادیر، ایلک باهار بئله،
ائل منه، یازماسین لعنت یاغدیرار.
یاغدیرار، یاغدیرار، نئجه یاغدیرماز،
بو قؽزیل قلمی او وئریب منه،
ویجدانیم امر ائدیر شاعریم، یاز، یاز.
هله آز یازمیسان، دورما، یاز یئنه.
گئدیرم یئنه ده وصالا دوغرو،
طعنه‌لر یاغ‌سا دا بیگانه‌لردن.
بیلیرم، عزمیم‌ده دوغرویام، دوغرو،
خیالیم اوزاق‌دیر افسانه‌لردن.
اؤز شخصی دردینه قالانلار منه،
هؤرومچکلر کیمی تور هؤرمه‌سینلر.
اۆریی قارا داش اولانلار منه،
مقدس دردیمی چوخ گؤرمه‌سینلر.
بو شاعر کؤنلومون محبّتینی
بیلیر حیدربابا، ساوالان بیلیر.
جنوبون تۆکنمز مصیبتینی
هامی‌دان داها چوخ سلیمان بیلیر.
چوخ دا گنجلییم‌دن اوزاق‌دیر یاشیم،
گله‌جک ایللرده گؤزوم وار هله.
جنوبون دردینه قاریشیب باشیم،
دۆنیایا بیر دۆنیا سؤزوم وار هله.
قوی ائللر ائشیت‌سین، قوی بیل‌سین وطن،
وصال دئیجیم سون نفس‌ده ده.
آندیما وفالی قالاجاغام من،
تورپاقلار آلتین‌دا دار قفس‌ده ده.
قان‌لی گؤز یاشلاریم دئییل‌دیر عبث
نیسگیلیم، حسرتیم یئتمییر سونا.
وصال‌دان شاد خبر وئرسیدی هئر کس،
جانیمی موشتولوق وئرردیم اونا.