منو
سوسویوب‌دور گئنه کیمین قانینا
سوسویوب‌دور گئنه کیمین قانینا،
خومار-خومار باخار هارا گؤزلرین؟
نولا بیر ده دولانایدیم باشینا،
قوربانی اولایدیم قارا گؤزلرین!
مۆقووس قاشلارین ائتگینن کامان،
چکگینن مۆژگان‌دان تیری-جانسیتان،
بو خسته جانی‌می قؽلگینن نیشان،
قوی ائتسین کؤکسومو پارا گؤزلرین.
سنوبر قامتین، ائی سروی-رفتار،
شۆمشادو ار’اری ائتدی شرمسار،
نه یالقیز ائتمیسن منی خارو زار،
چوخلاری گتیریب زارا گؤزلرین.
عارضین دؤورون‌ده زۆلفی-مۆشگیناب،
قویماز شفق سال‌سین قرصی-آفیتاب،
حؤکم قؽل گؤتورسون سایه‌سین سحاب،
بو درده ائیله‌سین چارا گؤزلرین.
اۆزون شعشعه‌سی، ائی شمعی-چکیل،
خورشیدی-خاوری ائتدی منفعل.
بئله کی، عشق اودو اولدو مشتعل،
چک‌دیره حق منی دارا گؤزلرین.
خدنگی-خونریزین، ائی شیرین منظر،
خوسرووو تختین‌دن ائتدی دربدر.
حلقه ائدیب الده زۆلفی معنبر،
نه سحر اوخور گئنه مارا گؤزلرین؟
تزه گۆلتک آچیلیسان سحردن،
مزیّن اولوسان لؤلۆ گۆهردن،
یاخشی سالدین نباتینی نظردن،
عجب مایل اولموش خارا گؤزلرین!