صبا، مندن سؤیله او گۆل عذاره،
بۆلبول گۆلوستانه گلسین، گلمهسین؟
بو هیجران دۆشکونو، ایللر خستهسی
قاپینا درمانه گلسین، گلمهسین؟
من قوربانی اولوم عنبر تئللرین،
قؤنچه دوداقلارین، پۆسته دیللرین،
او لاله رۆخسارین، میشکین خاللارین
اودونا پروانه گلسین، گلمهسین؟
گؤزوم چوخ حسرتدیر خومار گؤزونه،
گۆنش جامالینا، شکر سؤزونه،
اوتانیرام، نئجه دئییم اۆزونه،
دردین خسته جانه گلسین، گلمهسین؟
دولاشدیر بوینوما شۆمشاد قولونو،
قوجاقلاییب قوجوم اینجه بئلینی،
لعلی-لبین امیم، سوروم دیلینی،
ایستر اؤلو جانه گلسین، گلمهسین؟
نباتی ایستمز سنسیز دۆنیانی،
عزتی، حؤرمتی، شؤوکتی، شانی،
بیر زادا قالماییب داها گۆمانی،
بو باش او میدانه گلسین، گلمهسین؟