صبا، بو عرضی‌می یئتیر صیّاده

صبا، بو عرضی‌می یئتیر صیّاده،
سؤیله، باغیشلاسین خودایه منی.
طاقتیم کسیلیب کۆنجی-قفس‌ده،
مرخص ائیله‌سین بیر آیه منی.

اگرچی بیلیرم چوخ‌دور گۆناهیم،
دخی اوندان اؤزگه یوخ‌دور پناهیم،
دئگینن: اۆمیدیم واردیر کی، شاهیم
عفو ائتسین آیه-ی-وفایه منی.

گئجه‌لر صبحه‌دک ایشیم ناله‌دیر،
آغلاماق‌دان گؤزوم قان پیاله‌دیر،
جانیم بۆتون قارا داغ‌لی لاله‌دیر،
یئتیرسین زمزم-ی-صفایه منی.

ملامت چکمک‌دن یئتیشدیم جانه،
اریدی اۆرییم، دؤندو آل قانه،
صبا، عرضیم بودور شاهی-جهانه،
دخی چوخ سالماسین صدایه منی.

نباتی، مجنون تک گاهی آغلادین،
اوشاقلار یؽغیب دسته باغلادین،
گاهی قلندر تک اؤزون داغلادین،
آخیر کی، گتیردین هرایه منی.