بۆلبول کیمی گۆل اۆزونه مۆشتاقم،
طوطی قوشو دیللی صنم، ائی صنم،
آل-الوان یاناقلی، نرگیز باخیشلی،
بنفشه تک اییلی، صنم، ائی صنم.
هر کیم گؤرسه سنی اولور دیوانه،
دۆشر مجنون کیمی داغا مستانه،
قوربانی اولدوغوم یئتیشدی جانه،
قارا حبش خاللی، صنم، ائی صنم.
لبی قؤنچه، دیشی دۆرری-مصفا،
مهمهسی شمامه، بوخاغی آلما،
دهانی گۆلشکر، زۆلفو دیلآرا،
جیبی، قوینو هیللی، صنم، ائی صنم.
غمزهن اوخو اود ووروبدور جانیما،
جلاد گؤزون سوسویوبدور قانیما،
باشینا دؤندویوم، گل بیر یانیما،
سرخوش، اینجه بئللی صنم، ائی صنم.
نباتینین یئتیر باغی-وصاله،
ناحق قان ائیلمه، باتما وباله،
عشقین منی دؤندریبدیر هیلاله،
آدی، سانی بللی، صنم، ائی صنم!