گئنه ایسکندر تک دۆشدوم ظلماته

گئنه ایسکندر تک دۆشدوم ظلماته،
قاباغی‌می کسیب یوز مین بحر و بر.
ایگیدلیین، مروّتین چاغی‌دیر،
یئتیش فریادیما، ائی خضری-رهبر!

طلوع ائتمز ندن «شمس والضحا»؟!
فنایه باش چک‌سین «لیلة الدجا»،
یوخ‌سا یاتیب مگر نسیمی-صبا،
مشامیما یئتمز نفخه-ی-سحر؟

اۆزومه بیر سو سپ، ائی اشکی-گۆلگون،
قویما یات‌سین غافل بیچاره مجنون،
ایتیرمیش فرهادین کوهی-بیستون،
شیرین-شیرین سسلر، تاپماز بیر اثر.

یارا قوربان دئین دیلی لال ائتدیم،
مهر ائدیب آغزی‌می، ترکی-قال ائتدیم،
الف تک قددی‌می بۆکدوم، دال ائتدیم،
ایندی گؤرک بو کمانی کیم ایر؟

نباتی، مینگینن رخشی-همتی،
سئیر ائله سربسر دشتی-وحدتی،
قویما چؽخ‌سین الدن وقتی-فورصتی،
حیفسن، دۆنیادان گئتمه بیخبر!