گئنه گلدی باهار فصلی،
بۆلبول گلدی داده، داده.
احمری گۆللر آچیلدی،
ساقی، گتیر باده، باده!
گئنه سبز اولدو چمنلر،
گۆلدن بزندی گۆلشنلر،
چؽخمیش سئیره گۆل-بدنلر
هامی اۆزو ساده، ساده.
وه، وه گۆلدور بو، یا لاله،
گۆل اۆزونه قونوب ژاله،
ساقی، دور، وئر بیر پیاله
دلی فرهاده، فرهاده.
یار یولوندا وئردیم باشی،
یاستیق ائتدیم قارا داشی،
دؤندو، بیللاه، گؤزوم یاشی
شطّی-بغداده، بغداده.
دلی کؤنول، غم زامانی،
چوخ ائتمه آهو فغانی،
چاغیر شاهی-لافتانی،
یئتسین فریاده، فریاده.
ساقی، دور، وئر بیرجه ساغر،
دیندن دؤندوم، اولدوم کافر،
تاپاممادیم، قالدی گوهر،
قعری-دریاده، دریاده.
نباتی، دور هر سحرگاه،
اوخو حمد و قل-هو-الله،
قالمادی الحمدوللله،
آرزین دۆنیاده، دۆنیاده.