آمان، آغا، سنه قوربان،
منی سالما نظردن سن!
سندن ساوای کیمسنم یوخ،
منی قووما بو دردن سن!
من گئتمرم کوه-ی-طوره،
مئیل ائتمرم نار و نوره،
گتیر منی سن بیر شوره،
کم دئییلسن شجردن سن.
پریده اولماز بو طلعت،
ملکده اولماز بو صورت،
ائده بیلمم گۆنه نیسبت،
منوّرسن قمردن سن.
دردیمی ائتمه زیاده،
منی گتیرمه فریاده،
بیر رحم ائله بو فرهاده،
گل بو کوهی-کمردن سن.
لعلی-لبین نوشخندی،
من نئیلرم بالی، قندی،
اؤلدوردو بو دردمندی،
چوخ شیرینسن شکردن سن.
گۆلده هانی بو طراوت؟
گۆنده هانی بو صباحت؟
دۆرده یوخدور بو لطافت،
مزیّنسن گۆهردن سن.
غم ائیلمه، خانچوبانی،
تاپیلدی دردین درمانی،
یاد ائله شاهی-مردانی،
بیر علی چک جیگردن سن.