اعتیراف

کیتابلاریمی واراقلایارکن

بیر آخشام تنهالیق الینده قالدیم،
اؤتن گۆنلریمی یادیما سالدیم.
آپاردی فیکریمی فیکیر کاروانی،
ائله بیل یئنیدن گزدیم دۆنیانی.
گزدیگیم یئرلری بیر داها گؤردوم،
سونرا او گۆنلردن گئری‌یه دؤندوم.
گؤردوم تک اولسام دا اوتاغیمدا من،
ائله بیل کیم ایسه توتدو الیمدن،
کیتاب رفلری‌نین گلدیک اؤنونه.
او دئدی، تنهالیق یاراشمیر سنه،
بو سولغون کیتابلار سنین دئییلمی؟
یؽغیلیب رفلره‌ده اۆست-اۆسته ایندی،
نیه حاللارینی سورمورسان، نیه؟
اونلارا سن همدم اولمورسان نیه!
یولونو گؤزله‌ییر باخ بو کیتابلار،
بوردا آرزولارین، ایناملارین وار.
هر کیتاب بیر ایلی سالاجاق یادا،
نیه تک قالمیسان سن بو اوتاقدا؟..
باخدیم کیتابلارا دگیشدی حالیم،
دئدیم، کئشمکئشلی بو عؤمور یولوم.
سیزینله باشلادی، ایللردن بری،
قالدی واراقلاردا عؤمرون ایزلری...
آچیب کیتابلارین توزونو سیلدیم،
واراغینی سیلدیم، اۆزونو سیلدیم.
آچدیم، نئچه تانیش اۆز گؤردوم اوردا،
اۆرگی تیتردن سؤز گؤردوم اوردا.
یازدیغیم آنلاری یادیما سالدیم،
بعضی شئعرلرین حئیرانی اولدوم.
تبریزلی گۆنلریم یادیما گلدی،
وطنده تورپاقدا، داش دا گؤزلدی.
او واخت شئعر یازدیم آیا، اولدوزا،
سئودیگیم بوغدایی گؤزل بیر قؽزا.
شئعرله باشلادی منیم بیر گۆنوم،
شاهی دامغالادی غضبیم، کینیم.
شئعریم آغیزلاردا، دیللرده گزدی،
او سؤزلر ایندی ده منه عزیزدی...
سونرا دا باشلاندی هیجران گۆنلری،
جانیمین جؤوهری، آلنیمین تری.
آخدی واراقلارا گئجه‌لر منیم،
دئدیم، یاد اللرده قالدی وطنیم.
هر شئعرین باشیندا وطنی یازدیم،
بیلدیم اونوتماییب او، منی یازدی...
آنجاق او آیری واخت، آیری زاماندی،
قورونون اودونا یاشلار دا یاندی...
یازماق بیر درد ایدی، یازماماق بیر درد،
فیکره ده، سؤزه ده وار ایدی سرحد.
سنین عوضینده دۆشونن واردی،
هر نه دئییلسه‌یدی او دا قراردی...
ایندی کیتابلاری واراقلایاندا،
هامان او شئعرلر دۆشورلر یادا.
ائله بیل چمنده تیکاندی اونلار،
اؤزومدن اؤزومه عۆصیاندی اونلار.
بیلمیرم نه ائدیم؟
جؽریم، توللاییم!
یازدیغیم گۆنلره بلکه یوللاییم؟!
بلکه ده دۆز اولماز وئردیگیم قرار؟
اونلاردا عؤمرومون بیر پارچاسی وار!
گؤزومون نورو وار، بئینیمین اودو،
زامانین حؤکمویله اونلار دوغولدو.
ایندی نه فرقی وار قالا، قالمایا،
منیم کیتابیمدا اولا، اولمایا.
عؤمرونو یاشامیش اؤلودور اونلار،
تاریخین کئچیلمیش یولودو اونلار...
باخیب کیتابلارین توزونو سیلدیم،
واراغینی سیلدیم، اۆزونو سیلدیم،
قاییدیب یئریمده اوتوردوم یئنه،
تزه‌دن قاییتدیم اؤز عالمیمه...

12 دئکابر، ۱۹۹۸