قاضی برهان‌الدین

قاضی برهان‌الدین (۱۳۴۴-۱۳۹۸م) آذربایجان تورکجه‌سی‌نین بؤیوک شاعیرلریندندیر. او سالور بویونا منسوب اولوب سیواس شهرینده آتاسی‌نین یانیندا تحصیل گؤرموش و ایگیرمی یاشیندا ایکن آتاسی اؤلونجه اونون یئرینه شهرین قاضی‌سی سئچیلمیشدیر. تورکجه، فارسجا و عربجه شعر یازمیش، تورکجه دیوانی غزلیات و رباعی و تویوقلاردان تشکول ائتمیشدیر.

بو شاعیرین سیاسی و علمی شؤهرتی شاعرلیگینی کولگه‌ده بوراخمیشدیر. سیواس قاضی‌سی اولاندان سونرا امیرغیاث‌الدینین قیزی‌یلا ائولنمیش و اوز آدینا بیر دؤولت قورموش و ۱۳۹۸-ده آغ‌قویونلو دولتی‌نین باشچیسی طرفیندن اؤلدورولموشدور.

قاضی برهان‌الدین‌ین دیوانی‌نین تک الیازما نسخه‌سی لندن‌ده بریتانیا موزه‌سینده‌دیر. بو دیواندا ۱۵۰۰ غزل، ۲۰ روباعی و ۱۱۹ تویوق واردیر.