ای گول، سنی هر کس کی، سئویب بخته ور اولدو
عشقینده بیر آنجاق منیم عؤمروم هدر اولدو
کیم سئودی قارا زولفونو، آغ گونلره چیخدی
طالع منه یار اولمادی، بیر دردِ سر اولدو
من آغلادیم اؤز حالیما، بیگانه سئویندی
شوکر ائیله کی، من قالدیم او مندن بتر اولدو
کؤیوندا منه ظلم ائله یندن بری غالیب
آهیم اودو یاندیردی، هامی دربدر اولدو
ییخماقدی منی مقصدی نامرد رقیبین
بار وئرمهدی مقصودی، بوتون بی ثمر اولدو
آیریلماز ایدیک بیرـ بیریمیزدن، آرامیزدا
گؤز دگدی بیزه، بلکه ده،بیر بد نظر اولدو
بیر بیلمهدین اؤز خئیرینی، بیگانه نی توتدون
منسیز سنه، ای گول، نه قدر گؤر ضرر اولدو؟!
ائو ییخماغی، قان تؤ کمه گی ظن ائتمه، هنردیر
هرکیم وطنین سئودی، او اهلِ هنر اولدو
وحشی لیگه، نامردلیگه، نادانلیغا نفرت
انسانلیق ایله عؤمر ائله ین بخته ور اولدو
سندن سورا، واحد، آییق اول، قوی دئمه سینلر
دونیایا گلیب گئتدی، حاییف، بی خبر اولدو