گلدی باشیمیزا مین قان، مین قادا
بونلار تاریخدن ده بیزه تانیشدیر.
بشرین قولدارلیق زامانیندا دا
بو میلّت قول آلیب، قول ساتمامیشدیر.
ندیر قول بازاری، هاردان چؽخدی بو؟
اؤز حالال یوردوندا میلّت قول اولدو؟
قؽش اؤتدو، یاز گلدی، بیتمهدی یونجا
خزانا دؤندومو شیرین خیاللار؟
اوتوروب سکیده کۆچه بویونجا
مۆشتری گؤزلهییر بو تزه قوللار.
بیر پارچا چؤرکچین بو بدبختلرین
آچیلیر باشینا مین جۆر اویونلار-
سحردن آخشاما قایا چاپماغا،
زیبیل داشیماغا حاضیردی اونلار.
"گل" - دئیه چاغیرسان، اللیسی بیردن
جوماجاق اۆستونه داش سکیلردن.
اؤزون سئچ، چکینمیر قول اولدوغونا
آز، یا چوخ، نه وئرسن شۆکراندیر اونا.
قولون نه حاقی وار "بو آزدیر" دئیه
صاحیب آغاسییلا چنه دؤیمهیه؟
ساتدیق قاراباغی اوف دئمهدن بیز
ساتدیق اوتئللری، زاوودلاری دا.
مین جۆر ثروتیمیز، وار-دؤولتیمیز
ساتیلدی، ائل قالدی قوروجا یورددا.
بیری-بیریمیزی ساتیریق بو گۆن
آییرا بیلمیریک دوغمادان یادی.
وردیشه چئوریلیب ساتماق بیزیمچون
داها ساتیلماغا بیر شئی قالمادی.
حرّاجا قویموشوق بو مملکتی،
ایندی ده ساتیریق ناموس، غئیرتی.
عۆنوان لکهلندی، آد لکهلندی،
تاپداندی مین ایللیک شرف ده، شان دا.
آماندیر، قویمایین، ساتیلیر ایندی
میلّتین منلیگی قول بازاریندا.
وارلی تانیییرام ویجدانی میسکین،
قؽیماز بیرجه قوروش وار-دؤولتیندن.
بیر آجی دویدورماق، نادان نه بیلسین
ثاوابدیر یۆز کعبه زیارتیندن.
دوردوغوموز یئرده بیز آددیم ساییب،
ایرهلی گئتمهدیک بیر آددیم بئله.
دایم دیلهدیگی حاقا چاتماییب،
بو میلّت نییسه گؤزلهییر هله.
دورور ایللر بویو دوردوغو یئرده
بو یولون اوّلی، آخیری مجهول.
میلّتین یاریسی یاد اؤلکهلرده،
یاریسی دوغماجا وطنینده قول.
آداملار تالانیر اؤز منزیلینده
اجنبی صاحیبکار لاپ آغ ائیلهدی.
آلدیغی زاووددا آنا دیلینده
دانیشماغی بیزه یاساق ائیلهدی.
اجنبی آغادیر سانکی بو یوردا
سینهم آیاقلارا یول اولموش بو گون.
ائلاوغلوم هم یورددا، هم ده کناردا
حاکیم اجنبییه قول اولموش بو گۆن.
اونلار ایش آختاریر یاشاماق اۆچون
بو عادی ایستک ده چوخ ایمیش مگر؟
بیزدن ایش ایستهین بو مؤحتاجلارین
یاشاماق حاقی دا یوخ ایمیش مگر؟
ایستیقلال قازانیب بیز ائله بیلدیک،
قورتاردیق میلّتی قهر ائدن اوددان.
اما بیلمهدیک کی، محروم ائدیلدیک،
داغلاردا قوروتدان، آراندا توتدان.
ازیلیر، سویولور بو خالق گۆنبهگون،
دؤزومده، صبرده، واللاه، فیل اولدوق.
بلکه بو میلّتی قول ائلمکچون
بیز قان باهاسینا مۆستقیل اولدوق؟
اؤلکم مۆستملکه، یادا قول ایکن
میلّت گلمهلره قول کی، دئییلدی.
ایندی بو مملکت مۆستقیل ایکن
میلّت قولا دؤنوب سؽندی، اییلدی.
عۆنوان لکهلندی، آد لکهلندی،
تاپداندی مین ایللیک شرف ده، شان دا.
آماندیر، قویمایین، ساتیلیر ایندی
میلّتین منلیگی قول بازاریندا.