تلاتومسوز اۆرکده
قان دا سؽرسیرا باغلار.
تلاتومدن یارانیب
دئیردیم سؽرا داغلار.
سو جوشماسا، داشماسا،
قرانیت قایالارلا
اۆز-اۆزه توققوشماسا
تزهلنمز،
دورولماز.
دویغو دنیزلرینده
چاغلایان اۆرکلره
سینهلر ده دار اولماز...
عؤمور بورولغاریمدان
ساخلاماسین قوی منی
آنامین
قاپیمیزدا
یاندیردیغی اۆزرلیک.
منیم خوشبختلیگیمچین
منه گرک دئییلدیر
دریاجا بختورلیک.
هیجانسیز
دار گلیر
منه کؤکسون قفسی.
اینسان نفسی وئرین، منه
اؽنسان نفسی.
نئیلهییرم نفسسیز
سؽرا-سؽرا دۆزولموش
رقمی،
عددی من؟
ایستهمیرم، آ قارداش،
یۆز-یۆز یالان وعدی من...
منه رنگسیز، بویاسیز
بیرجه دوغرو سؤز وئرین.
مین گئجهنی نئیلیرم،
منه حرکت دولو
مین سسلی، مین دویغولو
تکجه بیر گۆندوز وئرین!
یۆز-یۆز یالواریشلارا،
مین-مین تمنّالارا
دگیشمرم
اۆرکدن
گلن سسی، سمری من.
ایستهمیرم یۆز ایللیک
ایزسیز کئچن عؤمرو من.
منه
هیجان دولو
یالنیز بیرجه گۆن وئرین.
یۆز اولدوز سیزین اولسون،
منه بیرجه گۆن وئرین!
هر شئیی بۆتون وئرین!
زیروهلرین باشیندا
زیروه کیمی تک اولوم!
آغلایاندا من بولود،
گۆلنده شیمشک اولوم.