آرازین سویو

آرازین سویو قؽزیل
پاریلداییر پؽریل-پیریل،
موغانلار گۆللنیبدیر،
گل گؤزل، تاماشا قؽل.

گؤی آتیم، پولاد ناللیم،
بوراخما یولدا قالیم،
دان یئری ایشیقلانیر،
یئل اسیر سالخیم-سالخیم.

گۆل گلیر، رئیحان گلیر،
یار گلیر، جانان گلیر.
اوزاقدان توز اوجالدی،
شیمالدان کاروان گلیر.

آغاران داغ سسیدیر،
قار یئرین پرده‌سیدیر.
دویدوغون او نغمه‌لر،
شاعیرین اؤز سسیدیر.

هیجرانلی گۆندن بری،
گئتمه‌دی عشق اثری،
سئوگی بیر زنجیردیر کی،
قؽریلماز حلقه‌لری.

شیرواندان قوشلار قاچار،
ساوالان اۆسته اوچار.
او تایدا، هم بو تایدا،
بیر گۆنده گۆللر آچار.