سون آرتیریلمیشلار

مین سؤزه یئنی آرتیریلمیش تورکجه شعرلر

هر یاندا بیر مجلیس قورولوب گئدیر،
بوز کیمی بولاقلار دورولوب گئدیر.
داغلارین دؤشویله بورولوب گئدیر،
گؤر نئجه قوووشور یوللارا یوللار،
سیز نه گؤزلسینیز، یوللار، آ یوللار!

داغین اتگینه قدم قویونجا،
قارقار اوغولداییر دره بویونجا.
دوروب حۆسنونوزه باخیم دویونجا،
باخیم حئیران-حئیران من سیزه، یوللار!
ایلک دفعه گلمیشیک اۆز-اۆزه، یوللار!

سرین بولاقلاردان ائللر سو ایچمیش،
دوستونو دۆشمندن یاخشیجا سئچمیش.
بوردان واقیف گئتمیش، ویدادی کئچمیش،
گرک کی، اونلاری تانی‌یا یوللار،
اونلارین لپیری هانی، آ یوللار؟

سئویرم چشمه‌لی، سولو داغلاری،
وۆقارلی داغلاری، اولو داغلاری.
دؤیسه ده قار، یاغیش، دولو داغلاری،
دولانیب آپاریر داغلارا یوللار،
باخچالارا یوللارا، باغلارا یوللار.

داغلارین زیروه‌سی آغا بۆرونور،
یاشیل قۆزئیلردن دومان سۆرونور.
قلبیمدن بو یئره یوللار گؤرونور،
گؤر نئجه قوووشور یوللارا یوللار،
سیز نه گؤزلسینیز، یوللار، آ یوللار!

۱۹۵۴
یارغان باشینداکی
   بوز قایا اۆستدن،
وۆقارلا یۆکسلیر قوجا بیر پالید.
آیاغی آلتیندان آخیر دومان، چن،
باشی‌یلا گؤیلره دیرنیر پالید.

اونون توخومونو هانسی بیر سحر،
قارتاللار گتیریب بورایا سالمیش.
او حیات عاشیقی،
   گؤرن کیم دئیر،
نئچه واخت داشلارین قوینوندا قالمیش؟

آنجاق طبیعته یاز گلنده او،
اویانمیش یوخودان داغلارلا بیرگه.
داغلاردان اوجالان قاتی چنده او،
بویلانمیش قایادان باهارلا بیرگه.

قوی گلیب من اونا
   یاخیندان باخیم،
شاهیدی نئچه یاز، نئچه ده قؽشدیر.
بلی، حیکمته باخ، کیچیک بیر توخوم،
بؤیوک بیر قایانی پارچالامیشدیر!

قالخمیش محبّتله گۆنشه دوغرو،
اۆستوندن هئچ زامان نور اسکیلمه‌میش.
ایتی اسن کۆلک، جوشغون آخان سو،
اونون وۆقارینی ایه بیلمه‌میش!..

بو گۆن چیچک آچمیش یالچین قایادا،
اونون داغ اۆرگی، اونون داغ عشقی.
نه ایله اؤلچولر گؤرن دۆنیادا،
حیات محبّتی، یاشاماق عشقی.

۱۹۵۶
الوداع، عؤمرومدن اؤتوشن بیر ایل،
گؤزل اؤنونده‌کی، حئیرت، الوداع!
الوداع، دالغالار، الوداع، ساحیل،
چکدیگیم عذابلی حسرت، الوداع!

الوداع، ائی یاشیل چینار کؤلگه‌سی،
چینارین سحیرگار سسی، الوداع!
الوداع دومانین اوزاق نغمه‌سی،
قلبلرین سۆکوتو، سؤزو، الوداع!

الوداع، قوملاردا سیرلی ناخیشلار،
ساحیللره دۆشن ایزلر، الوداع!
الوداع، مهریبان، نورلو باخیشلار،
هردن او سۆزولن گؤزلر، الوداع!

الوداع، گؤی مئشه، چال-چارپاز بوداق،
واختسیز دوغولموسان، ائی باخت، الوداع!
الوداع هر شئیه، هر شئیه، آنجاق،
سئوگیمه دئمرم هئچ واخت: الوداع!

6 یانوار ۱۹۹۳
یوخودا دنیزلر آشیب-داشیرلار،
تورپاغا ایز دۆشور، داشا ایز دۆشور.
دالغالار ساحیلله پؽچیلداشیرلار،
میرواری قوملارا قوشا ایز دۆشور.

اوچوب قوووشورسان اوجا بولودا،
تور گلمیش گؤزوندن چکیلیر دومان.
...ال چاتماز دۆنیایا گئدیب یوخودا،
گنجلیک ایللریله قوووشور اینسان.

اۆز-اۆزه دورورسان سن گۆنشله ده،
سعادت دورنانین تئلینده گلیر.
هردن گؤروشورسن، ایلک گؤروشله ده،
ائوه آغ دوواقلی گلین ده گلیر...

یئتیملیک کؤچ ائدیر عؤموردن بعضاً،
یئنه دوغما آنا توتور الیندن.
نه بؤیوک عالمدیر آنالی یوخو،
معناسیز جاهاندا معنالی یوخو.

آخدی گؤزلریندن یاش گیلدیر-گیلدیر،
یوخودان اویاندین... یئنه تنها-تک.
دۆنیانی دییشمک دهشت دئییلدیر،
دهشتدیر بیر داها یوخو گؤرمه‌مک.

29 دئکابر ۱۹۹۲

دوستوم یحیی ممّدووا
تسکینلیک اۆچون

بیردن دوداقلاردا
   دولدو گۆلوشلر،
ائله بیل بۆرودو
   سۆکوت عالمی.
دوستوما اۆز وئرن
   آغیر بیر کدر،
دوستلار چیینینه ده
   ائندی داغ کیمی.
بیر اینسان گؤزونو
   یومدو جاهانا.
اۆچ اؤولاد
بیر آندا
   آتاسیز اولدو.
اۆرکمی وفاسیز
   چؽخدی اینسانا،
اینسانمی اۆرگه
   وفاسیز اولدو؟
اسدی خزان یئلی
   یاشیل چمنده،
گۆللر لچگینی
   تؤکدو سۆکوتلا.
سئوینج های-هارایلا
   گلیر گلنده.
کدرسه اۆرگه
   چؤکدو سۆکوتلا.
دوست سوسور...
باخیرسان...
   سن ده سوسورسان...
سؤز ایندی توفانلی
   فیکیرلریندیر.
سئوینجی بؤلوشمک.
   نه قدر آسان،
کدری بؤلوشمک
   نئجه چتیندیر
او سوسور،
دوستلار دا
   بو یئرده سوسور.
پاشا دیللنمه‌ییر،
   او پریشاندیر.
سوسماغی سئومه‌ین
   شۆکور ده سوسور،
جابیر سۆکوتویلا دوستا هایاندیر.
کؤنولده او قدر
   سؤزلر قالیر کی،
آخی، نئجه دئییم
   اونو دوستا من؟
سۆکوت اۆرکلره
   کؤرپو سالیر کی،
تسکینلیک یول آلسین
   همین کؤرپودن.
...گؤرور اۆچ اؤولادی
   دومان ایچینده.
سوسور...
اۆزو نورلو...
   باخیشی ایستی...
اویانیر قلبینده
   بیر آن ایچینده.
آتاسیز اوشاغا
   آتالیق حیسّی.
سنه — گئجه‌ن خئیره قالسین، — دئییرم،
کاش کی، سنی یوخولاردا من گؤرم!

سن جنّتدن واریب گلن قومروسان،
من کؤلگه‌نم، بیر اوچوروق سنینله.
سن طالعین سحیرلی بیر نوروسان،
آیریلارکن قوووشوروق سنینله.

بلکه منم پنجره‌ندن باخان آی؟
بولودلارین گۆر چاییندا آخان آی؟

زر اۆفوقلر آلوولانیب اریییر،
سپیلدیکجه جؽغیرلارا، ایزلره.
آی ائله بیل اؤپمک اۆچون اییلیر،
منیم اؤپه بیلمه‌دیگیم گؤزلره.

وارلیغیمدا عشقین درین حسرتی،
سانکی یاتمیش دویغولاریم اویانیر.
دوغما-دوغما اۆرکلرین حسرتی،
آیری-آیری اۆفوقلردن بویلانیر.

اولدوزلارین گور شفقی — تبرّیک،
یاخین اولدوز، اوزاق طالع — او بیزیک؟

گؤرمک اۆچون او، گؤزلری بیرجه آن،
من گئدیرم، قوشالاشیر کؤلگه‌میز.
کایناتدا بیر-بیرینه اوزانان
اولدوزلارین اللری‌ییک بلکه بیز؟

نور اولسایدیم قوپوب اوزاق اۆفوقدن،
دئمزدیم کی، کامان کیمی سسلنیم
کاش ساکیتجه اینجه تئله دؤنوب من،
هؤروکلرین آراسیندا گیزلنیم.

گئجه کئچیر، یوخو قاچیر، یاتمیرام،
سسیم چاتیر، اؤزوم سنه چاتمیرام.

سن جنّتدن واریب گلن قومروسان،
من کؤلگه‌نم، بیر اوچوروق سنینله.
سن طالعین سحیرلی بیر نوروسان،
آیریلارکن قوووشوروق سنینله.

22 یانوار ۱۹۹۸

ج.ناخچیوانسکی آدینا حربی مکتبین
۱۷ یاشلی طلبه‌سی روسلان عیسی‌یئو باجی‌سی‌نین
آد گۆنونه تلسرکن، مئترودا باش وئرمیش
یانغیندا (۲۸ اوکتیابر ۱۹۹۵-جی ایل) ۴ نفری
اؤلومدن خیلاص ائتمیش، اؤزو ده قهرمانجاسینا
هلاک اولموشدور.
   قزئتلردن


دۆنیا محوریندن
   قوپدو ائله بیل،
اوغلان گؤرمه‌دیگی دهشتی گؤردو.
قارا اژداها تک اوزانان تونئل
سانکی خورتوموندان اود پۆسکوروردو.

یئر اسدی آتشلی،
   اودلو سسلردن،
آلوو هۆجوم چکدی اینسان عؤمرونه.
اونون تلسدیگی آد گۆنو بیردن،
دؤندو فاجیعه‌لی فریاد گۆنونه.

آلووون نه مشوم دیللری وارمیش؟
دمیر ده یانارمیش، داش دا یانارمیش!

ائله بیل یاغیردی
   اودلو یاغیشلار،
اودلو سئل آخیردی رئلسلرین اۆستدن.
او بیردن دۆشوندو: "باجیم، باغیشلا،
سنین آد گۆنونه گئجیکیرم من".
اؤزو ده اودلاردا او یانا-یانا،
یانان اینسانلاری آلدی قوینونا.

الینده اؤلومون
   سؽندی قانادی،
مرد چؽخدی آلوولار کئشمکئشیندن.
او، اودلار یوردونون جاوان اؤولادی،
تزه‌دن دوغولدو اودلار ایچیندن.

قوروسون گؤز یاشی
   دوغما آنانین،
الله‌یم مردلیگی تسلّی وئردی.
...او گۆنش اۆرکلی ایگید اوغلانین
تابوتو اۆستونده گۆنش گئدیردی.

بو گۆن جالاندیقجا
   آیلار، آیلارا،
دۆنیا اودلو دنیز — عؤمورسه گمی.
سحر گۆنش قونور مرمر مزارا،
یانیر قهرمانین اؤز قلبی کیمی.

یئنه ده چاغلاییر
   عۆمّانلار بو گۆن،
یئنه اودلار یانیر یئر اۆزرینده.
او، خیلاص ائتدیگی اینسانلار بو گۆن،
گزدیریر ایگیدی اۆرکلرینده.

عؤمر ائدیر اولدوزلار سانی، ایگیدلیک،
بلی، ابدیدیر آنی ایگیدلیک.

20 نویابر — 14 دئکابر ۱۹۹۷
سیرلی بیر دۆنیادیر
سانکی هر عؤمور،
باخیشلار مهریبان،
سؤز صمیمیدیر.
اونون اؤزو گۆلور،
گؤزلری گۆلمور.
بلکه گؤز سۆکوتو —
اۆرک غمیدیر.

او، ظریف اللردن
توتدوم من دۆنن،
ال وارمی، بئله‌جه
سحیرلی اولسون؟
او، اۆزدن بو قدر
خوشبخت گؤرونن
نه اۆچون بو قدر
کدرلی اولسون؟
ائنسه اۆفوقلردن
آغ بیر گؤیرچین،
اولار گؤی سولارین
بیاض دالقاسی.
عینی بیر طالعه
یازیلیر نئچین،
کدر عۆمّانی‌یلا
سئوینج داملاسی؟

اۆرک اووونماییر،
شیرین سؤز ایله.
او گؤزلرده یانان
کهکشان دئییل؟
هامی‌یا مهریبان
اولان گؤزله،
نه اۆچون طبیعت
مهریبان دئییل؟

هردن گؤز یاشینی
سیلن گؤزلره،
اوزاق اولدوزلارین
نورو تؤکولسون!
بیز چوخ آلیشمیشیق
گۆلن گؤزلره،
گۆلمه‌ین گؤزلرین
قوی بختی گۆلسون!

10 مای ۱۹۹۹
چیینلرده یئرین-گؤیون غمیدیر،
آه چکیرسن آسیمانا یئتیشیر.
قادینسیز ائو —
   توفانداکی گمیدیر،
او نه باتیر، نه لیمانا یئتیشیر.

آغیر دردلر فاجیعه‌نین گۆجودور،
نه سئوینیب، نه ده گۆله بیلیرسن.
قادینسیز ائو -
   خسته‌خانا کۆنجودور،
نه دیریلیر، نه ده اؤله بیلیرسن.

فلاکتده نئچه-نئچه سیرّ یاتیر،
سنی یؽخیر، پولاد کیمی او سؽنمیر.
قادینسیز ائو —
   گۆنشسیز بیر دۆنیادیر،
نه اود یانسا، قؽزینمیر کی، قؽزینمیر.

سن بیر قوشسان، روحون سؽنمیش قاناددیر،
هئچ باخما کی، کۆلک سرین، مئه ایلیق...
قادینسیز ائو —
   اولدوزسوز کایناتدیر،
همدمیندیر سۆکوت ایله قارانلیق.

ائی کیشیلر!
سئوگینیزی عزیزله‌یین جاهاندا،
قادینلیغین صداقتدیر ایلک آدی.
وای او گۆندن —
   عؤمرون آخیر آنیندا،
گؤزونوزو قاپایان دا اولمادی!

7-10 اوکتیابر ۱۹۹۶
بیر قؽز کئچدی بوردان،
کئچدی، دایاندی.
"شؽلتاقدیر" — دئدیلر، "دلی جئیراندیر".
اما کی، حۆسنونه هامی حئیراندیر.
بو گۆنسه ساحیللر او قؽزا حسرت.
آخشام گؤزلر یاندی،
   گور شفقلردن،
"— او اولدوز منیمدیر" — دیللندی بیردن:
"مارسا قاناد آچیب اوچاجاغام من"...
او، یوخدور، باخیرام اولدوزا حسرت.

من قۆطب اولدوزونو
گؤستردیم بو واخت:
تک او دییشمه‌ییر یئرینی آنجاق!
اونا بنزه‌میشم من ده یاناراق،
قؽشلار یاشامیشام من یازا حسرت.

سوسموش سؤزلریمی
   آچدیم کۆلگه...
سولان آغاجلارا، اولدوزلو گؤیه.
ایندی تک باخارام — سنسیزم -— دئیه،
چؤکوب قلبیم کیمی پاییزا حسرت.

زوغولبا، سئنتیابر ۱۹۹۸
سنه سجده قؽلدیم، سنه باش اَیدیم،
غضب سۆکوتونو قلباً ائشیتدیم.
گۆناهکار اولاردیم یالان دئسه‌یدیم،
حقیقتی دئدیم،
   جینایت ائتدیم.

من نئچه اونودوم نورلو گؤزلری؟
یقین صۆنعی ایمیش او "جان" سؤزلری.

سن منیم عؤمرومدن شیمشک اولوب کئچ،
مندن اوزاقدا دا منیمچین وارسان.
قاپیندان دیلنچی قوومامیسان هئچ
محبّت اومانی نئجه قووورسان؟

سوسورام... نه قادا، نه ده قان اولسون،
سئوگی‌یه حقیقت قاداغان اولسون؟

سؤزومو اولدوزلار گؤیلره یازسین،
اؤلرکن من عشقین احتیاجیندان،
یالان قۆدرتلیدیر قوی منی آسسین،
آسسین حقیقتین دار آغاجیندان!

17 مای ۲۰۰۰
شعر منیم اۆچون بیر کایناتدیر،
اونون اولدوزلاری،
   گۆنشلری وار.
شعر منیم اۆچون سیرلی حیاتدیر،
اونون اؤز سئوینجی،
   اؤز کدری وار،

شعر ده یاشاییر اؤز باهاری‌یلا،
اونا یول دا وئریر سونسوز آسیمان.
او کئچیر طبیعی آددیملاری‌یلا،
صۆنعی پئیکلرین آشدیغی یولدان.
کئچیر آددیم-آددیم
   کنددن، شهردن،
اولدوزلار اۆستونون ناخیشی کیمی.
او کئچیر باشینا یاغسا دا هردن،
تنقیدلر مِتئور یاغیشی کیمی.
سؤزوم ده گۆجونو
   ائللردن آلیب،
قوی اوچسون گؤیلره،
   او، بیرنفسه.
قالین قاتلارداکی یانان پئیک اولوب،
نه غم،
   نئچه شعریم گئری دؤنمه‌سه.
نه قدر قول-قاناد،
   آچسا دا ایلهام،
من آنا تورپاغین سینه‌سینده‌یم.
نه قدر گؤیلره اوچسا دا ایلهام،
من یئرین جاذیبه قۆّه‌سینده‌یم.
یئنه دۆشونجه‌لر آپاریر منی،
دئییرم: سوسمارام بوران-قار اولسون.
گزیرم سئودیگیم آنا وطنی،
میصراعلار گزیرم،
   میصراعلار اولسون.

شعره وورولدوغوم، دئ، آی‌می، ایل‌می؟
قلبیم آرزولاردا، دیلکلرده‌دیر.
ان بؤیوک کاینات صنعت دئییلمی،
صنعت کایناتی اۆرکلرده‌دیر.

هر کس خوشبخت اولار اؤز دیاریندا،
عزیزدیر ازلدن اؤز یئریم دئدیم.
کاش خالق اۆرگی‌نین فضالاریندا،
دۆنیالار دولاشا بیر شعریم دئدیم.

باخیرام گؤیلره قلبیمده شعر،
اولدوزلار اوزاقدان گؤز وورور منه.
کاینات سیرّینی آچسا دا بیر-بیر،
صنعت کایناتی سیرلیدیر یئنه.

بلی، شعر منه بیر کایناتدیر،
سؤزلو، سوراقلیدیر
   بیر کیتاب کیمی.
بلی، شعر منه سیرلی حیاتدیر،
آچسام دا،
   باغلیدیر بیر کیتاب کیمی.

۱۹۹۲
گلدی ریا،
گئتدی حیا!

باخدی پاخیل،
یاندی تاخیل!

گۆلدو یالتاق،
آغلادی داغ!

پؽچ-پؽچ چوغول،
اؤزونه قول!

قانون گۆدن،
یؽرتدی گؤدن!

بسدیر، شاعیر،
هارای نه‌دیر؟

سؤزلر اوجوز،
بشر قودوز!

وعدلر — بلا،
ائل مۆبتلا!

دیندی نادان،
سوسدو جاهان!

12 مارت ۲۰۰۰
— فرسیزسن، دۆزونو
دئییرم سنه.
باخ، قونشون داش اکیب
آلماس بیتیریر.
گؤم-گؤی اسکیناسلار
آخیر جیبینه‌!
— کیم نه‌سه قازانیر،
   نه‌سه ایتیریر،
ان بؤیوک قورخو دا
   وار-دؤولت وئریر.

— سنین گۆنون کئچیر،
غمده، تلاشدا،
اونون گؤر نئجه ده
بختی گتیریر.
باشچی‌یا باش این
یوخاری باشدا...
— کیم نه‌سه قازانیر،
   نه‌سه ایتیریر،
یالتاقلیق — معنوی
اسارت وئریر.

— فرسیزین قؽریلار
عؤمرو یاریدا.
اوندان عیبرت گؤتور،
گؤر نه‌دیر بو سیر!
یۆکسک رۆتبه‌ده‌دیر
اؤولادلاری دا...
— کیم نه‌سه قازانیر،
   نه‌سه ایتیریر.
سون حؤکمو البته
   عدالت وئریر.

— عدالت گلینجه
جان گئدیر الدن.

کیتاب حسرتیله
یان سطیر-سطیر.
او، الدن برک توتور،
سن ایسه ائلدن...
— کیم نه‌سه قازانیر،
   نه‌سه ایتیریر.
اصیل قیمتی ده،
   ائل، میلّت وئریر!
منه غیبطه ائتمز،
   دۆنیادا هئچ کیم،
منه آنجاق منیم
   غۆروروم قالدی،
بو گۆن منیمله‌دیر
   ایتیردیکلریم،
فقط قازاندیغیم
   بو گۆن خیالدیر!

7 اوکتیابر ۱۹۹۹
گؤزلنمز قوناق تک
جاهانا گلدیک،
گؤیده اولدوز یاندی،
سسسیز — سمیرسیز.
دۆنیادا بیر گوشه
کیرایه‌له‌دیک.
دئدیک: — نه گؤزلدیر
بیزیم ائویمیز.

ائله بیل کدرله،
غمله یاشیدیق.
کدرسیز سئوینج یوخ،
عزیز ساخلایاق.
آغلاییب گلمیشدیک،
آغلار یاشادیق.
ماجال اولاجاقمی
سوندا آغلایاق؟

آتیلدیق ایللرین
غوغاسینا بیز،
پای اومدوق جاهانین
سخاوتیندن.
ساندیق کی، عؤمروموز
باهاسینا بیز،
چؽخاریق دۆنیانین
خجالتیندن.

کیم دئدی: قاپیلار
پوللا آچیلار،
کیم دئدی: دۆنیایا
اؤزومم شریک!
نئچیندیر بو قدر
آغری-آجیلار؟
لۆت گلدیک، ائله‌جه
لۆت ده گئدیریک.

دۆنیا عۆمّان اولدو،
بیزسه تک آدا،
یئنه ایشیق ساچدی،
او، اوزاق اولدوز.
کیرایه توتموشدوق
بیز بو دۆنیادا،
خرجینی اؤدیه
بیلمه‌دیک، افسوس!

حیاتین نیفرتی،
محبّتی وار.
ایللر یولوموزا
گۆللر سره‌جک.
دۆنیانین نه بؤیوک
سخاوتی وار،
بیزه بئش قاریش دا
تورپاق وئره‌جک،

آخاجاق اولدوزوم
زر تؤکه-تؤکه،
سون گۆن سون منزیله
ائنه‌جک بلکه؟

8 یانوار ۲۰۰۰
— یئر ده، گؤی ده اسیر سن جوشان کیمی،
بو قدر دۆنیادا سرتلیک کی، اولماز!
— ائشیت اۆرگیمی، دینله سسیمی،
توفانلار اولماسا ساکیتلیک اولماز.

— چاغلاییب جوشدوقجا سن قارانلیقدا،
آخی نئچه گؤروم توفان قلبینی؟
— منده غضب ده وار، مهریبانلیق دا،
فقط سؽندیرمارام اینسان قلبینی.

— ائله بیل قوووشور یئرله آسیمان،
دنیزده دالغالار — هر بیری داغدیر.
— دۆنیا تزه‌لنیر من اسن زامان،
دریا چاغلاییرسا، دورولاجاقدیر.

— آماندیر، لاله‌لر اۆستوندن اسمه،
کۆبار سۆلاله‌لر اۆزریندن اس!
— گؤیلر ده سس وئریر، منیم سسیمه،
توفاندان پایینی آلاجاق هر کس.

— توفان، حاقسیزلیغا سن اعتیراضسان؟
بس، نئچین آدینلا یول آلمیشام من؟
— اگر توفان دولو بیر شعر یازسان،
دئیرم قلبینده یورد سالمیشام من.

9 یانوار ۲۰۰۰
کیم ایسه، نه‌ییسه
سئچیر دۆنیادا،
عاقیل گؤزللیگی،
اۆز گؤزللیگی!
آدام وار شربت تک
ایچیر دۆنیادا،
ساختا سسلنسه ده
سؤز گؤزللیگی.

منیم گؤزله‌دیگیم
گؤزللیگیم گل،
کیم دئیر چمندن
صحرا گؤزلدیر؟
منیمچین جاهاندا
هر شئیدن اوّل،
اۆرک گؤزللیگی
داها گؤزلدیر!

بئله گؤزللیگی
گؤرمک ثاوابدیر.
هر اینسان بیر جۆره
دویور عالمی.
اۆرک گؤزللیگی
تمیزدیر، صافدیر.
دریالاردان چؽخان
میرواری کیمی.

3 آوقوست ۲۰۰۰

پاییز واختی داغلار قوینوندا مۆشفیق ائوینه
گئدن کؤرپونو سئللرین اوچوردوغونو گؤردوم

عزیز مۆشفیقیمی
   بو دوغما داغدان،
دۆنن قانلی-قانلی اللر آییردی.
بو گۆن بورا گلن دوستدان، قوناقدان،
چاغلایان دالغالار، سئللر آییردی.

قومرال ساچلارینی
   دارادی کۆلک،
خوشباختلیق گزرکن درد چکدی بوردا.
قبرین یوخ، قبرینه سجده‌یه گلک،
ائل سنه کیچیجیک ائو تیکدی بوردا.

اینامی محبّت،
   آندی حقیقت،
اونون نه دهشتلی طالعی واردی،
زنگین سارایلارا سؽغمایان شؤهرت،
بو کیچیک کومایا نئجه سؽغاردی؟

او، ایلهام داغیندا
   زیروه‌یه چاتدی،
وطن سجده قؽلدی مغرور سؤزونه.
او، مین-مین اۆرگه کؤرپولر آتدی،
طبیعت قصد ائتدی سون کؤرپوسونه‌!

ائو ده یئتیم قالدی،
صاحیبی کیمی،
دوردو یئرین-گؤیون،
قالیبی کیمی!

بوردادیر محبّت،
   حؤرمت یوللاری،
یئنه گؤروشریک یاز سحرینده.
گلر دسته-دسته ائل اوغوللاری،
ساخلایار کؤرپونو چیینلرینده.

اوکیابر ۲۰۰۰-یانوار ۲۰۰۱

دۆنیا شؤهرتلی عالیم دوستوم،
پروفسور رافیق یوسیفلی‌یه

سیلینسین اۆرکدن
   حسرتین غمی،
مۆقدّس یئر دئیه،
   گؤی دئیه گلدیک.
داغلار ان الهی
   اهراملار کیمی،
دوستوملا داغلاری
   سجده‌یه گلدیک.

باشیمیز اۆستونده زرلی قانادلار،
کهربا چینارلار، قؽزیل پالیدلار.

بئله یئر دۆنیادا دئیین وارینیدیر،
مئشه پؽچیلداییر، بولاق دانیشیر؟
گۆنشدن سۆزولن اولدوزلارمیدیر،
یا کهرابا یانیر، قؽزیل سایریشیر؟

سیرلی بیر قلمله سؤز یازا-یازا،
آغاجلار زر سپیر یوللاریمیزا.،

من بوردا پاییزین اوغلان چاغیندا،
مئشه‌لر قوینوندا نئجه زنگینم.
هاچان آخشام دۆشور —
   آی ایشیغیندا،
پالیدلار بویانیر پولاد رنگینه.
بو داغلار نه اولو
   بیر افسانه‌دیر،
بوردا خزان اؤزو زر خزینه‌دیر.

قارشی زیروه‌لرده مارال گؤروندو،
سونرا بیردن-بیره خیالا دؤندو.

عؤمرونو قویدومو گۆلله یاریدا؟
شاعیر بوردا دایان، شاعیر بوردا دور!
مهریبان داغلارین اووچولاری دا
اینصافسیز اولماییر، مهریبان اولور.

سحیرلی سسلرله دولودور جاهان،
دینیر بۆللور چایلا، پارلاق شلاله.
بیر زیروه دانیشیر جعفر آدیندان،
بیر زیروه دانیشیر مۆشفیق دیلیله.

دؤنوروک، بیزیمله
   قوشا گئدیرلر
کهربا چتیرلر،
   قؽزیل چتیرلر.
گئدیر داغ آمانی، آهی بیزیمله،
گئدیر داهیلرین روحو بیزیمله.
تورپاق عطیرلیدیر،
   سما عطیرلی،
ناغیل دۆنیاسینا دگدیک قاییتدیق.
یئرلر مؤعجوزه‌لی، گؤیلر سحیرلی،
جنّت قاپی‌سینی
   دؤیدوک قاییتدیق.

اوکتیابر-نویابر ۲۰۰۰
بلکه واختسیز اسن
   سَمومدور اینسان.
صحرادا سوورولان توفانا محکوم.
اونسوز دا اؤلومه محکومدور اینسان،
اؤلومدن ده بئتر هیجرانا محکوم!

یوللاری آیریدیر
   خئیرین، شرین ده،
سوسان حقیقتلر یالانا محکوم.
او قدر ملک وار یئر اۆزرینده،
دئدیم کی، اولمارام شئیطانا محکوم!

اۆرکدن اۆرگه
   کؤرپو آتیرام،
اؤزومسه اوچروما، یارغانا محکوم!
من کی، دردلر آلیب، غملر ساتیرام،
بئله آلیش-وئریش زیانا محکوم!

یئر اۆزو تیتره‌یر،
   گؤی اۆزو آغلار،
دۆنیا فاجیعه‌لی زامانا محکوم.
چینینده گۆنشی گتیرن داغلار،
گؤرورسن بیر قاتی دومانا محکوم!

بشرین دردینی
   هر آن چکن من،
یاشارام علاجا، درمانا محکوم.
بیر داملا سو اۆچون تشنه ایکن من،
اولموشام بیر دوزلو عۆمّانا محکوم!
من کی، هئچ بیلمه‌دیم
   نیه دوغولدوم؟
عصره محکوم گلدیم، جاهانا محکوم.
اؤزومو بیر ساربان
   سایسام دا،
       اولدوم
منزیله چاتمایان کاروانا محکوم!

10 نویابر ۱۹۹۶