قاضی مصطفی ضریر

مصطفی یوسف‌ اوغلو ضریر ۱۴-جو میلادی عصرین ان بویوک تورک شاعیرلریندندیر. اونون دوغوم یئری ارزروم و دیلی آذربایجان تورکجه‌سیدیر و شرقی آنادولو لهجه‌سینه چوخ یاخیندیر. یعنی بوندان ۶۰۰ ایل قاباق دانیشدیغیمیز دیلدیر. آنادان دوغما کور اولدوغو اوچون «ضریر» (گؤزسوز) تخلوصونو سئچمیشدیر. شاعیر حافیظه قوتیله ایسلام دیللرینی و معاریفینی موکمّل اؤیرنمیش و قاضی‌لیک روتبه‌سینه چاتمیشدیر.

ضریرین شهرتی اؤز ساغلیغیندا آنادولو، سوریه و میصرده یاییلمیشدیر. میلادی ۱۳۷۷-جی ایلده (۷۷۹ ه‍ ق) میصره گئتمیش و اورادا میصر سولطانی ملک منصورعلی‌نین حوضورونا چیخمیش و ۵ ایل اونون یانیندا قالمیشدیر. بو دؤورده میصرده تورک حومدارلاری مملوکلار حکومت ائدیردیلر. ضریر‌ ملک منصورعلی‌نین ایستگیله «سیرت نبی» کیتابینی نثر و شعر شکلینده تورکجه‌یه چئویرمیشدیر.