او شوخ غمزه‌لرین، خنجر کیرپیگین

او شوخ غمزه‌لرین، خنجر کیرپیگین
گۆنده اولور یۆز مین قان قاباغیندا،
خومار-خومار باخان آلا گؤزلرین
گرکدیر وئره‌سن جان قاباغیندا.

قاشین قاباغیندا سؽغاللی بیرچک،
سایه سالمیش اۆزه شؤعله مۆبارک،
اما ایکی دسته تر بنؤوشه تک
قویموش آل یاناغین یان قاباغیندا.

زۆلفوندن قوخوشار گۆل و ریحانلار،
قوربان هر مویینه یۆز مین جاوانلار،
پیشوازینا گلیر حوری غؽلمانلار،
ملاییک دورموشلار سان قاباغیندا.

واقیف قوربان زنخدانین چاهینه،
شیرین گۆلوشونه، خوش نیگاهینه،
قول اولاسان بئله خوبلار شاهینه،
دوراسان هر آخشام، دان قاباغیندا.