تا نور دیده اول رخ گلناری بیلمیشم

تا نور دیده اول رخ گلناری بیلمیشم،
مصباح لم یزل من او دیداری بیلمیشم.
کون و مکانی وئرمیشم اونون وصالینه،
بازار عشق ایچینده بو بازاری بیلمیشم.
تفسیر قیلمیشام خط و خالین کتابینی،
اول عارفم که نکته‌ی اسراری بیلمیشم.
غرق اولموشام غمینده فراقین جفاسینا،
چون وصل لم یزل من او گلزاری بیلمیشم.
ای گوهرین حقیقتی نطقوندن آشکار!
شُکر ائیلرم که نطق گهرباری بیلمیشم.
جان و جهانی وصلینه شکرانه قیلماغا،
ناصح منه سن اولما! من اول کاری بیلمیشم.
تا زلف پیچ و تاب ایله سئودایه دوشموشم،
دام بلاده طرّه‌ی طرّاری بیلمیشم.
ای صورتین تجلّیسی انواری کؤنلومون،
خورشید لم یزل من او رخساری بیلمیشم.
یار اولدو چون حقیقی‌یه یارین غمی، بوگون،
یارین غمینده درد ایله هم یاری بیلمیشم.