تؤکولرسه...

آرزولار باهاردا، عؤمور قؽشدادیر
قورو هارای چکر، یاش تؤکولرسه،
عاقیل یاشدا دئییل، عاقیل باشدادیر،
باشین نه گۆناهی ساچ تؤکولرسه.

بعضاً جوشوب-داشان سموم اولارسان،
ایللرده اریییب سن موم اولارسان.
دۆنیا لذّتیندن محروم اولارسان،
آغزین نه گۆناهی دیش تؤکولرسه.

نامرد ائله‌مه‌یین قوواراق مردی،
اینام خیانته کؤکسونو گردی.
گؤیدن درین اولار یئرلرین دردی
اولدوزلار یئرینه داش تؤکولرسه.

نبینی آه بوغار، آمان آغلادار،
حسرت ده، نیسگیل ده یامان آغلادار.
اینسان قدیر بیلمز، زامان آغلادار،
گؤزون نه گۆناهی یاش تؤکولرسه.

۸ آپرئل ۱۹۹۵