منو
خوجالیدا اریک آغاجی
"آتامی، آنامی خوجالیدا اؤلدوردولر. اریک
آغاجیمیزی یاندیردیلار... ایندی یوخولاردا
همیشه اریک آغاجیمیزی چیچکله‌ین گؤرورم"
قؽزجیغازین دئدیکلریندن
او، یاندی، آتشی
توتدو عالمی،
ائندی یئره گۆنش —
گؤیلرین تاجی.
قانلی جینایته
عابیده کیمی،
یۆکسلدی قاپقارا
اریک آغاجی.
رذالت سسلندی
بۆتون جاهاندا،
بو آلچاق آدینا
یاراشیر آنجاق!
آغاج صاحیبینه
گۆج چاتمایاندا
آغاجین اؤزوندن
اینتیقام آلماق!
سن ائی حقیقتی
اونودان یاغی،
دئ، نه ائده‌جکسن
بس قیصاص چاغی؟
قؽشین یوخوسوندان
اویاندی تورپاق،
دۆنیانین گؤزلری
اریکده قالدی.
— باهار - نفسینی
دۆنیادا تورپاق،
کؤکلردن
بیر شیو اوجالدی.
عزیز آناسیدیر
وطن — آغاجین،
آنا گؤزلری‌نین
یاشی دایانمیر.
دوغما تورپاغیندا
بیتن آغاجین،
بوداغی یانسا دا،
کؤکلری یانمیر.
اریگین بیر یئنی
بوداغی دوغدو.
بوداغا آنا تک
سۆد وئردی کؤکلر.
اوجالدی سمایا،
گۆنشه دوغرو،
گلدی بو تورپاغی
سجده‌یه گؤیلر.
بیر آیدا بوی آتدی
بوداق بیر قولاج،
داغ اونو اویاتدی
اؤز نفسی‌یله.
دۆنن یوخولاردا
گۆل آچان آغاج،
بو گۆن چیچکله‌دی
یاز نفسی‌یله.
یاد گؤزلر آغاجا
کینله باخدی کی...
اللر گؤی بوداغی
کسمه‌یه گلدی.
گؤیلرده ائله بیر
شیمشک چاخدی کی،
شیولر کسیلمه‌دی،
اللر کسیلدی.
چیچکلر تورپاغین
آرزو-کامیدیر،
گۆندوز ده دۆشمنچین
گئجه اولاجاق...
بو هله طبیعت
اینتیقامیدیر،
گؤر اینسان قیصاصی
نئجه اولاجاق!
قؽزیم، کؤرپه بوداق —
چیچک آچدیقجا،
قلبین اورا قونان
گؤیرچین اولدو،
گۆنش یولوموزا
ایشیق ساچدیقجا،
سنین یوخولارین
قؽزیم، چین اولدو!
۱۹۹۲