منه اینانمیرسان بیر یوخو کیمی،
قلبینده شۆبههلر، ائیهاملار اویاق.
یوخ، من ایستهمیرم بیر چوخو کیمی
یاشایاق بو سایاق، اؤلک بو سایاق...
نیه باخیشلارین اۆشودور منی،
قلبین کی، قلبیمده قؽزینماق ایستر.
نه سئوگی یئنیدیر،
نه نیفرت یئنی،
ائله ترودّود ده کؤهنهدیر، یئتر!..
بلکه ده آدیما چوخ سؤز دئییرلر،
ایستهسن اینانما، ایستهسن اینان...
آییق اول!..
آداما چوخ سؤز دئیرلر؛
گؤر هانسی دوغرودور،
گؤر هانسی یالان.
یاخین گل،
اودونا گیر بو اۆرگین،
سئونلر پاییزا، قؽشا بۆرونمز.
اصیل چیچکلرله کاغیذ چیچگین
اوزاقدان باخماقلا فرقی بیلینمز...
هردن زنگ ائدیرسن... سوسورسان، نیه؟
سنین سۆکوتون دا تانیشدیر منه.
بیر ده زنگ ائدیرسن
حیرصلنیم دئیه،
دستگی چؽرپیرام عصبلریمه.
بیر دستک گۆلوشلو،
بیری عصبی،
باشلاییر تلفون اویونو سونرا.
بیلیرم سوسماغین نهدیر سببی،
اوخ آتیب گیزلنمه یاییم، سونرا...
منه اینانمیرسان بیر یوخو کیمی،
قلبینده شۆبههلر، ائیهاملار اویاق.
یوخ، من ایستهمیرم بیر چوخو کیمی
یاشایاق بو سایاق،
اؤلک بو سایاق...