سنه بو نوع دئگیلدیم امیدوار، ای دوست!

کؤنول اولوبدو فراغیندا بیقرار، ای دوست،
نئچین منی ائله دین زار و دلفکار، ای دوست!
امید الیم اوزولوب دامن وصالیندان،
سنه بو نوع دئگیلدیم امیدوار، ای دوست!
بنا طاقتیمی سیل غم خراب ائتدی،
بو قدر گؤزلریمی ائتمه اشکبار، ای دوست!
وصالده نئچه گون خوش کئچیردی ایامیم،
حسد آپاردی بیزه چرخ کج مدار، ای دوست!
نه سن فراقه سبب اولموسان، نه من باعث،
بو درده سالدی بیزی دؤور روزگار، ای دوست!
سنی وفالی بیلیب عشقینه کؤنول وئردیم،
پری لقا لره اولمازمش اعتبار، ای دوست!
اولار نه لطف ایدی، ای گولعذار، بو نه جفا،
ترحم ائت، منی اؤلدوردو خار خار، ای دوست!
سنی قسم وئریرم اول کریم ذی شانه،
بیان قیل منه کؤنلونده هر نه وار، ای دوست!
فدا اولوم سنه، سیّد سنین غلامین دیر،
بو قدر ذلته ائتمه اونو دوچار، ای دوست!