بیر مکتوبا جاواب

بیر مکتوبا جاواب

دوست گرامی، سنه اولسون سلام!
سنسیز اولوب عیش بیزیمچین حرام.
گول آچیلیب، موسم گولزاردیر،
بولبول خوش لهجه یئنه زاردیر.
داغ دلین ظاهر ائدیب لاله لر،
ساغر ریحانه دولوب ژاله لر.
هودهود اولوب قاصد شهر صبا،
مژده وئریر عالمه باد صبا.
تخته چیخیب باغده سلطان گول،
ظاهر ائدیب شوکت ایله شان گول.
سرو آچیب باغده خزرا الم،
لاله اولوب خسرو مولک جم.
صفحۀ گولزار اولوبدور صفا،
بولبول اوخور نغمه نی صبح و مسا.
فرش زمرد دؤشنیب گولشنه،
جمله اولوب باغ معطر یئنه.
آچ گؤزومی، صفحۀ گولزاره گل،
آز بو قدر محنت ایله زاره گل!
چک چمنه یوسف دورانی سن.
کوکب رخشان، مه تابانی سن.
باس قدمین، باغی ائله پایمال،
قالمایا گولزارده هرگز جلال.
سیّد ایلن سئیر گولوستان ائله،
دشمن نادان جیرین قان ائله!