ای نشوهلی، ای عیشوهلی اۆمّید!
لعنت سانا، ای آفت-جاوید!
آرتیق یئتر، ال چک، بن اوساندیم؛
اوّل سنی بیر باکیره ساندیم،
آرقان سؽرا گزدیم یاپا-یالنیز،
هپ مکرینه اویدوم سنین، ای قؽز!
گئت! آنلادیم آرتیق نه ایمیشسین.
دویدوم کی، ناسیل فیتنه ایمیشسین.
بیر باشقا دیل-آشوفتهیی گئت، بول!
کئچ، گئت! سؽریتیب دورما، کنار اول!
دفع اول کی، گؤزوم گؤرمهسین اصلا،
یاقدین بنی، ای سؽتمالی خولیا!
قارشیمدا دوروب تیترهمه، ای ظیلّ!
بیتدیم، داها یوق بنده تحمّول.
اینسان نه قدر مایل-غفلت!؟
سندن اومویور ذئوق-سعادت!
وار بیر قورو حیکمت، او دا یانلیش...
اۆمّید ایله گویا یاشانیرمیش!
بیر سؤز کی: یالان، ساچما، خورافات...
آلدانمام او افسانهیه، هئیهات!..
ای یأس! سن ای حۆزن-سرآزاد!
آغوشوما گل، قؽل بنی دیلشاد!
روحیمله برابر یاشا یالنیز،
گل قلبیمه گیر، ای ساری یؽلدیز.
یالنیز بانا اول مونیس و همدم!
یالنیز اولاییم بن سانا محرم،
سئودیم سنی، ای سئوگیلی دیلبر!
گل، آغلایالیم شیمدی برابر.
چؤهرهن مۆتورّیم کیبی کۆسکون...
سندن چکینیر هر کس اونونچون.
دالغین باقیشیندان قاچار اینسان،
بیلمم نهدن ائتمیش بنی حئیران!؟
عالم سنی ظنّ ائتسه ده چیرکین،
لاکین بانا سور! - بنجه گؤزلسین.
حۆرّ اولماق ایچین خئیلی یورولدوم،
ائش کندیمه یالنیز سنی بولدوم.
زیرا سانا یار اولمایان اینسان
زنجیر-اسارتده وئریر جان!
روحوم ایرر عۆلویته سندن،
سنسیز ازیلیر، محو اولوروم بن.
قلبیمده اگر وارسا متانت،
سندن، یئنه سندندیر او قوّت.
اۆمّید ایله اینسانه گلن حیسّ،
یا کیذب و ریادیر، یا تبصبوص.
لاکین سانا مفتون اولان احرار،
لاقئید اولور، ای یار-فۆسونکار!
میسکین یاشاماز، ظۆلمه تاپینماز،
راحت نه، سفالت نهدیر آنماز،
سنسیز یاشاسام، باغریم اولور قان،
قوش، گل بانا، ای رهبر-ویجدان!
اوچ، گل بانا، ای همدم-حیسّیم،
بیر دربهدریم، یوق بیر انیسیم.
سنسیز یاشاماق بنجه تنزّول،
سنسیز گبریرسم او دا بیر ذۆلل...
گل، روحومو گۆلدور ده چکیل، گئت!
یا قلبیمی یار، پارچالا، محو ائت!..