سون آرتیریلمیشلار

مین سؤزه یئنی آرتیریلمیش تورکجه شعرلر

سئودیگیم آلایدی اۆزوندن نیقاب،
بیر ده باخیب او جمالی گؤره‌یدیم.
تاماشا ائده‌یدیم قاشا، قاباغا،
حلقه زۆلفو، خطّی، خالی گؤره‌یدیم.

اولموشام من اونا عاشیق-دیدار،
تاپیلماز بیر بئله گؤزلری خومار،
لبیندن نوش ائتمک خیالیمدا وار،
یار بیلیرمی بو خیالی، گؤره‌یدیم.

او خوبلار سروری، سرخوش سلاطین،
آچایدی سراسر گؤزل صۆفاتین،
قویایدی امیدیم قندین، نباتین،
آغزینداکی شکر، بالی گؤره‌یدیم.

کؤنلونو آینا تک ائیله‌یه‌یدی پاک،
بیر سؤز دئسم، اولمایایدی غضبناک،
دورایدی قارشیمدا سرخوش، سینه‌چاک،
خوش‌ایقبالدیر، او ایقبالی گؤره‌یدیم.

گاه نارین دره‌یدیم، گاه گۆللرینی،
گاه سیاه زۆلفونون سۆنبوللرینی،
گاه دا بیر توتایدیم آغ اللرینی،
واقیف دئر، نه مۆلک و مالی گؤره‌یدیم.
الده آینا، گؤزه سۆرمه چکنده،
آلا گؤزون بولاغیندان اؤپه‌یدیم.
زنخدانین چئوره‌سیندن، خالیندان،
قلم قاشین قاباغیندان اؤپیدیم.

زۆلف ایلن بزنیب گلنده اۆزون،
قصد ائدیر یئنه جان آلماغا گؤزون،
وصف-زبانیندان چؽخاندا سؤزون،
دیلین، دیشین، دوداغیندان اؤپه‌یدیم.

آلایدیم یاشماغین، آچیب کمرین،
چؽخاریب اَینیندن زربافین، زرین،
اییله‌ییب-اییله‌ییب زۆلف-عنبرین،
اۆزدن سونرا بوخاغیندان اؤپه‌یدیم.

گئجه-گۆندوز دوعام بودور تاریما،
نولا سنی سالا بیر گۆذاریما،
ایله‌ییب-ایله‌ییب باسام باغریما،
ایکی گۆلگز یاناغیندان اؤپه‌یدیم.

واقیفین باغرینی دؤندردین کؤزه،
یار اودور کی، یارین جؤورونه دؤزه،
یاریم ساللانیبان گلنده بیزه،
دۆشوبن ال-آیاغیندان اؤپیدیم.
سنین تکی سیاه تئللی، گۆل اۆزلو،
بو ج‍ۆمله جاهاندا من گؤرمه‌میشم.
آغزی نازیک، قاشی اوزون، قدّی دۆز،
بیر بئله سینه‌سی گئن گؤرمه‌میشم.

بیر ماه اۆزلو سئودیم کئچن سنه‌ده،
خؽردا خاللار زنخداندا، چنه‌ده،
ویلایتی گزدیم، هئچ کیمسه‌نه‌ده
بیر بئله شؤوکت و شان گؤرمه‌میشم.

گؤزللر ایچینده طۆرفه، عالی شان،
دئییب، گۆلوب شیرین-شیرین دانیشان،
چوخ گؤرموشم سیاه زۆلفو پریشان،
اما کی، قدّینه تن گؤرمه‌میشم.

صدف دهانیندا دیشلرین دۆری،
دیر بو دۆنیایا اونون هر بیری.
یا ملکسن، یا حوریسن، یا پری،
اینساندا سن تکی جان گؤرمه‌میشم.

خنجر کیرپیگیندن ساچیلیر قانلار،
سنه قوربان یۆز مین قاشی کامانلار،
دوروب ساللاناندا اۆزولور جانلار،
واقیف دئیر بئله خان گؤرمه‌میشم.
باخیب جامالینا غۆرور ائیله‌مه،
سن ده بیر یول-ارکان گؤزت، سئودیگیم!
یارین دیلی شیرین گرک، اۆزو خوش،
ائده عاشیقینه عیزّت، سئودیگیم!

گؤزل چوخدور، ملک، پریزاد دا وار،
گلسین گؤروم، هانسی سن صۆفاتدا وار.
نه شهد-شکّرده، نه نباتدا وار
لبلرینده اولان لذّت، سئودیگیم!

حلقه قوی اۆزونه زۆلف-پۆرتابی،
گؤرنلر بَینسین، دئسین حسابی،
آلتدان گۆلگز، اۆستدن یاشیل تۆرابی،
بو رنگ ایلن اؤزون بزت، سئودیگیم!

اندامین گۆلدور، ای صنم، سراسر،
ایسترم باشینا دؤنم سراسر،
دلیک-دلیک اولدو سینه‌م سراسر،
غمزه اوخون منه آز آت، سئودیگیم!

واقیف تک دردیمند آز دۆشر اله،
نه فایدا، قدرینی بیلمه‌دین هله.
اۆزونو بۆرویوب اؤرتمه گل بئله،
منیمله اؤزونو دۆزلت، سئودیگیم!
ساللانا-ساللانا دؤولتخانادان،
بیر چؽخا بویینه قوربان اولدوغوم.
گؤیده ملک، یئرده اینسان گؤزلی
سنسن، خوش خویینه قوربان اولدوغوم.

حۆسنون کیتابینی بۆلبوللر اوخور،
یای قاشین باغریما خدنگین توخور،
حلقه بیرچگیندن یاسمن قوخور،
بنفشه مویینه قوربان اولدوغوم.

لبلرین شیریندیر شربتدن آرتیق،
اۆزونو گؤرمکدیر دؤولتدن آرتیق،
ائشیگیندیر سنین جنّتدن آرتیق،
کعبه‌ی-کویینه قوربان اولدوغوم.
ای ملک خویلو، ای طوبا بویلو یار،
کوییندیر جنّت-ریضوانیم منیم.
حوری غؽلمان اولسا، گیرمز گؤزومه،
سنسن جاندان عزیز جانانیم منیم.

پریم، سنوبریم، گۆلبرگ-تریم،
گؤهریم، یاقوتوم، لعل-احمریم،
حکایتیم، فیکریم، ذیکریم، ازبریم،
خیالیمدا شیرین نیهانیم منیم.

خورشید-رۆخسارم، قمر جبینیم،
باهاریم، گۆلزاریم، خۆلد-برینیم،
یاریم، غمگوساریم، خوش نازنینیم،
گؤزلیم، گؤیچگیم، جاوانیم منیم.

وحدتیم، خوش‌گۆنوم، صؤحبتیم، دمیم،
فغفوروم، قیصریم، جمشیدیم، جمیم،
خوسرووم، خاقانیم، شاه-اعظمیم،
پادشاهیم، هم اعلا سولطانیم منیم.

ذؤقوم، صفام، سئیریم، باغیم، چمنیم،
سۆسنیم، سۆنبولوم، لاله‌م، سمنیم،
ختا و خۆتنیم، چینیم، یمنیم
هیندوستانیم، روموم، ایرانیم منیم.

سؤزوم، ایختیلاطیم، هر قال و قیلیم،
مطلبیم، مورادیم، خاطیریم، مئیلیم،
شکّریم، شیرینیم، گۆل‌شاهیم، لئیلیم،
زۆلئیخام، یوسیف-کنعانیم منیم.

حبل‌المتین زۆلفون، کعبه اۆزوندور،
محرابیم، منبریم قاشین، گؤزوندور،
واقیفم، ای صنم، سنین سؤزوندور
گئجه-گۆندوز فیکر و خیالیم منیم.
بدنین سراسر گۆل خرمنیدیر،
قامتین گؤزلدیر، گؤزل، سئودیگیم!
هئچ نه ایستمنم ایکی دۆنیادا،
سنسن منیم آخیر-ازل، سئودیگیم!

قول وئرمیشم بو جانیمی جانینا،
هاردا اولسام، کؤنلوم گلر یانینا،
نه قدر سؤیله‌سم سنین شانینا،
یاراشار مۆخمّس، غزل، سئودیگیم!

ایراق دورما، مندن جۆدایی گزمه!
سئویرسن، ای نازلیم، خودایی گزمه!
ایری اوتروب، بئله کینایی گزمه،
گل ایندی منیمله دۆزل، سئودیگیم!

آهیمی گؤیلره هر سحر چکدیم،
کم چکمه‌دیم، اما مؤعتبر چکدیم.
قوینوندا نار دردی اول قدر چکدیم،
اولدو رنگیم آخیر خزل، سئودیگیم!

خومار گؤزلرینی اویاق قویماسان،
یؽخیلان کؤنلومه دایاق قویماسان،
درمان ائیله‌مگه آیاق قویماسان،
شیکسته واقیفدن اۆز ال، سئودیگیم!
اونون اۆچون اویماز غئیری‌یه کؤنلوم،
بیر عجب زیبادیر منیم سئودیگیم.
حوری نه‌دیر، غؽلمان نه‌دیر، ملک نه،
هامیدان اعلادیر منیم سئودیگیم.

زۆلفلری سۆنبولدور، یاناغی لاله،
باخیشی تن ائدیر وحشی غزاله،
گؤزلری مستانه، آغزی پیاله،
گردنی مینادیر منیم سئودیگیم.

آینا توتار، زنخدانا گۆل دۆزر،
هر مویینه یۆز مین فیتنه-فعل دۆزر،
بیاض گردنینه سیاه تئل دۆزر،
ساناسان سونادیر منیم سئودیگیم.

بویو یاراشیقلی سرو-خورامان،
اندامیدیر آغ گۆل، سینه‌سی مئیدان،
کلاغایی گۆلگز، لیباسی الوان،
بیر گۆل-رعنادیر منیم سئودیگیم.

واقیفم، زۆلفلرین بندیوانی‌یم،
او کامان قاشلارین من قوربانی‌یم،
منه قدر ائله کیم، گؤهر کانی‌یم،
دئمه کی، مولّادیر منیم سئودیگیم.
صفالار گتیریب، تشریف بویوردون،
قدم باسدین بیزه، قوربان اولدوغوم.
آز قالا کی، سنین حسرتین بیزی
اینجلتمیشدی، اۆزه قوربان اولدوغوم.

سن گلدین، نور دولدو ائوه-اوتاغا،
گلدیگین یوللارا جانیم صاداقا،
دوروب قوربان اولماق سن تک قوناغا
نوشدور جانیمیزا، قوربان اولدوغوم.

من ماییلم، سندن دۆشمنم چاشا،
بولوت زۆلفه، آغ قاباغا، آی قاشا،
قوی دویونجا باخسین، ائتسین تاماشا،
حئیراندی گؤز-گؤزه، قوربان اولدوغوم.

سن قدّینه یاشیل-آللار گئییجی،
واقیف دخی سنه غزل دئییجی،
شۆکر الله‌ا، دئییل آدام‌یئییجی،
نولور گلسن بیزه، قوربان اولدوغوم.
منیم یاریم سؽغاللانیب گلنده،
ساناسان قان سۆزور دوداقلاریندان.
شؤعله وئریر زنخدانین چئوره‌سی،
نور تؤکولور گؤیچک یاناقلاریندان.

گردن چکیب، طعنه قؽلار قولارا،
حسرتیندن باغریم دؤنر سولارا،
پریلر ائولادی دئرلر بولارا،
بولار دا گؤزلدیر اوجاقلاریندان.

آغ سینه‌ن گؤزلدیر، گردن گؤزلدیر،
سراسر اندامین بیردن گؤزلدیر،
سرو قدّین صنوبردن گؤزلدیر،
قوللارین، توپوغون، بوخاقلاریندان.

دهانین صدفدیر، دیشلرین اینجی،
سن منی ائیله‌دین ائللر گۆلونجو،
لیباسین الواندیر، چارقات نارینجی،
ساچاقلار یاراشیر قؽراقلاریندان.

واقیفین دردینی بیله‌یدی یاری،
دردینه بیر درمان قؽلایدی یاری،
قدم باسیب مۆدام گله‌یدی یاری،
اؤپه‌یدیم الیندن، آیاقلاریندان.
زۆلفون باشی تاختالانیب قاباقدا،
قؽراق وئریر قصابه‌نین آلتیندان.
ایلان قویروغو تک قوشا قؽوریلمیش،
اوجو چؽخمیش زنخدانین آلتیندان.

قاشین ایشاره‌سی، گؤزون خوماری،
هر بیری‌سی یۆز مین فیل کمنداری؛
تر سینه‌ده آغ ممه‌نین کناری،
شؤعله وئریر گیریبانین آلتیندان.

سنین حۆسنون مات ائیله‌ییب فلکی،
جنّتده حورینی، گؤیده ملکی،
قؽزیل قولباقلاری، یانار بیلگی
قوجاقلاییب کهروبانین آلتیندان.

آپاریبدیر مندن روح-روانی،
تامام عاقلی، هوشو، دین و، ایمانی،
آغاراندا گۆلگز یاناغین یانی،
تیترر زۆلف-پریشانین آلتیندان.

واقیفم، جانانا گؤندردیم پئیغام،
گؤزوم یوللاریندا قالدی صبح و شام،
گلمه‌دی اول سرو قدِّ گۆل‌اندام
بیر چؽخایدیق بو هیجرانین آلتیندان.
ای ظۆلمو چوخ، قلبی قارا بی‌قرار،
اوتانمازسان، اما هئچ اوتانمازسان!
نه آنلاغین واردیر، نه بیر کمالین،
اونون اۆچون هرگیز سؤزو قانمازسان!

نه هۆرکورسن مندن، دؤنوب اوولارا،
داد ائیلرم، یئتیشمزسن هوولارا،
سن ده منیم کیمی بو آلوولارا
آخیر یاناجاقسان، دئمه یانمازسان!

گؤروم، سنین نه‌دن اولدو ایرین،
مندنمیدیر، یا غئیریدن چکرین،
آی بی‌موروت، مگر داشدیر جیگرین،
مۆدام سؽزیلدارام، هئچ اوسانمازسان!

لعنت گلسین او حۆسنونون باغینا،
سالمانام گؤزونو باغریم یاغینا،
دؤزورسن دؤز بو آیریلیق داغینا،
من دایاننام، اما سن دایانمازسان!

واقیف، لعنت گلسین یارین جانینا،
نه دردینه مئیل ائت، نه درمانینا،
اونون تکی بی‌وفانین یانینا،
اگر ایگید اولسان، هئچ دولانمازسان!
گۆلگون سراندازین تزه گۆل کیمی،
افشان ائتمیش آی قاباغین اۆستوندن.
یاناغین یانیندا زۆلفه توو وئرمیش،
اوجون سالمیش تر بوخاغین اۆستوندن.

گاه زامان باشینا تیرمه شال باغلار،
گاه اولور کی، زۆلف گیزله‌ییب، خال باغلار.
کلاغایین قاباغینا آل باغلار،
یاشیلین آلتیندان، آغین اۆستوندن.

نه گؤزل آدامسان، آی قاشلاری یای،
هئچ نوجوان گله بیلمز سنه تای،
گۆله‌باتین قؽیدیر، یوخسا یئنگی آی،
اؤپر، قوجار گۆل یاناغین اۆستوندن.

بیزیم ایله اولوب هاچاقدان آشنا،
گئنه هر گؤرنده ایستر یاشینا،
حیجاب ائیلر، کتان سالیر باشینا،
اوغرون باخار او یاشماغین اۆستوندن.

واردیر شیرین-شیرین خوش ایختیلاطین،
نه فایدا، واقیفه یوخ ایلتیفاتین،
طووس قانادی تک اوجو چارقاتین،
پرواز ائیلر سولو-ساغین اۆستوندن
نامه، گئدر اولسان یارین کویینه،
درد-دیلیم او جانانا دئگیلن!
بۆلبولویم قؤنچه گۆلوندن آیری،
باغریم دؤنوب قؽزیل قانا، دئگیلن!

قوربان اولوم کیرپیگینه، قاشینا،
سئل اولوبان قاریش آخان یاشینا،
پروانه‌لر کیمی دولان باشینا،
آتش توتوب یانا-یانا، دئگیلن!

دین-ایمانیم دۆز ایلقارا باغلیدیر،
حسرت جانیم بیر جۆت نارا باغلیدیر،
مۆرغ-روحیم زۆلف-یارا باغلیدیر،
چوخ چکمه‌سین زۆلفه شانا، دئگیلن!

قؽلمیش حۆسنون شؤوقو دردیمی افزون،
آیریلیق غمینده گؤز یاشیم جئیحون،
آغلیم باشدان گئتمیش، اولموشام مجنون،
بو واقیفه سن دیوانا دئگیلن!
گئتدیم آلا گؤزلو یارلا دانیشام،
دئدی اوغلان، دور گئت، سؤز واختی دئییل.
عاریف چوخدور، ائتمک اولماز ایشارت،
اویناتما قاشینی، گؤز واختی دئییل.

جادو غمزه‌لرین منلن یاغیدیر،
باد اسیر، زۆلفونو اۆزدن داغیدیر،
بوندان سونرا اؤپوب، قوجماق چاغیدیر،
ایختیلاط کئچیبدیر، سؤز واختی دئییل.

واقیف دئییر، یالوار یارا، کؤنلون آل،
بیر بوسه دیله‌ییب، بوینونا قول سال،
آرا خلوت ایکن، ائتمه قیل و قال،
تئز اول، چؽخدی جانیم، ناز واختی دئییل.
بی‌وفاسان، سندن اۆز دؤندرمیشم،
یالانچی‌یا، بی‌ایقرارا باخمارام.
سنی اوخ کیرپیگه حسرت قویارام،
باغرین اولسا پارا-پارا، باخمارام.

هاردا گؤرسن بیر سئوگیلی کیمسه‌نه،
ایستر کی، خیالین تئز اونا دؤنه.
منیم یاریم گرک باخا بیر منه؛
غئیری اۆزه باخان یارا باخمارام.

نیقاب چکیب اۆزه، خالی گیزلرم،
سیاه زۆلفو، رنگ-آلی گیزلرم،
قؤنچه تکی گۆل‌جامالی گیزلرم،
ساللام سنی آه و زارا باخمارام.

یانیمدا اعتیبار ساتا بیلمزسن،
بوینوندان گۆناهین آتا بیلمزسن،
بیزیمله ایختیلاط قاتا بیلمزسن،
دانیشما کی، او گؤفتارا باخمارام.

واقیفی دئرلردی چوخ گؤزل‌سئون،
ائله بیلدیم سن ده اونون کیمیسن،
بیلدیم ایندی، والله، سنده‌کی‌نی من:
بی‌وفاسان، بی‌ایقرارا باخمارام.
من یئنه خوبلارین پادیشاهیندان
اؤزومه دوست بیر نیگاری توتموشام.
صیّاد اولوب قوروب محبّت تورون،
لاچین گؤزلو خوب شیکاری توتموشام.

دال گردندن دۆشوب توتوب دالی زۆلف،
خوش گؤستریر زنخدانی، خالی زۆلف،
گؤرمه‌میشم بئله بیر صفالی زۆلف،
چوخ سۆنبول-عنبرباری توتموشام.

آغ اۆزونده سیاه ساچی بۆرمگی،
دال گردندن دۆشوب باش ائندیرمگی،
میانیندا ساچین اوجون هؤرمگی،
بۆتون دۆنیادا بو یاری توتموشام.

واقیفم، گؤرموشم بیر طۆرفه دیدار،
چکرم گؤرمگه بیر ده اینتیظار،
هر کسین دۆنیادا بیر قیبله‌سی وار،
من ده یؤنوم سنین ساری توتموشام.
هاردا گؤرسم بیر شوخ، کامان قاشلینی،
ایسترم جانیمی قوربان ائیله‌یم.
توتام زۆلفون اوجون، دؤنم باشینا،
باغریمی اودونا بۆریان ائیله‌یم.

من بیلیرم قدرین سرخوش جاوانین،
حلقه-حلقه زۆلفون، تر زنخدانین،
بو گۆل انداملی‌نین، سرو-روانین
دورام یئریشینه سئیران ائیله‌یم.

من اونون دردینه اولدوم مۆبتلا،
شمع-خیالیما او وئریر ضیا،
خوبلاردان کی، منه گلسه هر بلا،
ایسته‌مم اونا من درمان ائیله‌یم.

خوبلارا وئرمیشم دین-ایمانیمی،
شؤوکت و شانیمی، آد و سانیمی،
جلّاد تک گؤزلری آلسا جانیمی،
نامردم، من اگر آمان ائیله‌یم.

واقیفه رحم ائیله، باری الهی،
آگاه ائت دردیمدن اول اۆزو ماهی،
قدم باسیب بیزه گلسین ناگاهی،
بیر گئجه من اونو مهمان ائیله‌یم.
بیر اندامی نسرین، دوداغی قؤنچه،
بیر قامتی گۆلبون یارا عاشیقم.
اولسا یۆز اۆزو گۆل، گیرمز عینیمه،
من آنجاق بیر گۆل‌عوذارا عاشیقم.

گئجه‌لر صۆبحه‌دک ائیلرم ناله،
هرگیز دۆشمز کؤنلوم اؤزگه خیاله،
بیر گردنی مینا، آغزی پیاله،
بیر لهجه‌سی شیرین‌کارا عاشیقم.

بیر بوخاغی تورونج، سینه‌سی مئیدان،
بیر سؤزو جواهیر، میرواری دندان،
بیر مارال باخیشلی، کیرپیگی پئیکان،
بیر قاشلاری ذوالفقارا عاشیقم.

بیر گۆلنده لبلریندن بال آخان،
بیر بزَنیب سرخوش طوووس تک چؽخان،
بیر نیقاب آلتیندان پۆنهانی باخان،
بیر عجایب خوشگؤفتارا عاشیقم.

واقیفم، بدندن جانیم داغیلیر،
مجنون کیمی خانیمانیم داغیلیر،
گؤرمه‌ینده دین-ایمانیم داغیلیر؛
گئجه-گۆندوز من دیدارا عاشیقم.
بهانه توتوبان، بیزدن گئن گزمه؛
سیرّ سؤزون یادلارا دئین دئییلم.
کؤنول روا گؤرمز سنی یاد گؤره،
سنی اؤزگه‌سینه قؽیان دئییلم.

آرزوم بودور، گؤزوم تیکم گؤزونه،
دانیشاسان، قولاق وئرم سؤزونه،
تا اؤلونجه باخیم گۆنش اۆزونه،
آرزوم جاندا قالیب، دویان دئییلم.

واقیف دئییر، دویماز سئون سئوندن،
تا اؤلونجه ال گؤتورمنم سندن،
عبث-عبث نئچون قاچیرسان مندن،
من کی، ظالیم، آدام یئین دئییلم.