سون آرتیریلمیشلار

مین سؤزه یئنی آرتیریلمیش تورکجه شعرلر

ایاشیرین، نه خسروسین کی، شیرین جان سانا شیدا؟
جمالون چاشدی سلطانی اوزون ساچون شب یلدا.

شها، حسنون ایچینده سن چو بیر یالقوزک اولموشسون،
نولا عشقون ایچینده بن فرید اولور ایسم فردا.

بیزه وعده قیلوبدور تانلا اوچماق ایله حوریلر،
نولا امروز اولور ایسه بیزه اول وعدهی فردا؟

اگر مقصوده ایررسم، زهی نعمت، زهی دولت،
اگر ایرمز اولور ایسم، هزاران حسرتا، دردا!

چو صادق عاشقونم پس سنون عشقینله بن بیلم
چو بن بیر مجنون اصلییم من و لیلی بیله بیدا.

گرک آنجا چاغیرام بن ائشیگینده سحرگه کی،
قولاغوما ندا گله کی، یا لبیک! یاعبدا!

یوزونه بئلون آپاردی جان ایله کؤنولو کلّی
کیمی ظاهر، کیمی باطن، کیمی پنهان، کیمی پیدا؟
‫سوخته کؤنوللره قیلدی یئنه جار عشق‬
‫ای نئجه عاشقلری قیلدی یئنه زار عشق!‬

‫قیلدی یاخالارومی جمله معسر‪ 1‬مگر‬
‫آنین اوچون ائیله‌دی جدول پرگار عشق‪.‬‬

‫گرچه که‪ ،‬مخمور ائدر لبلری ایله جانی‪،‬‬
‫شُکر اونا کی گؤزلرون ائیله‌دی خُمّار عشق‪.‬‬

‫کفرونو گیسوسونون جانیمیز ایمان بیلور‪،‬‬
‫باغلایالی بئلومه بیر قارا زنّار عشق‪.‬‬

‫تولدو کؤنولده هوا‪ ،‬قویمادی خالی مکان‪،‬‬
‫لاجرم اولدو قامو بو در و دیوار عشق‪.‬‬

‫عاشق و معشوقه‌نین عشقله دور وارلیغی‪،‬‬
‫باخیجاق اول اورتادا یئنه گنهکار عشق‪.‬‬

‫خسته‌یه اولان شفا‪ ،‬عهدینه قیلان وفا‪،‬‬
‫مجلس ایچینده صفا‪ ،‬گُل بیتیرن خار عشق‪.‬‬

‫بیز نئجه‌سی عشق ایله اولمایالوم بیر‪ ،‬چون‬
‫بیز یوخ ایکن وحدته ائیله‌دی اقرار عشق‪.‬‬

‫ورزشِ عشق ائیله‌سه بیزجیله‌یین کیشیلر‪،‬‬
‫نولا چو ورزش قیلور گنبد دوّار عشق‪.‬‬

‫‪1‬- چتین‪ ،‬چتینلیک‪ ،‬چتین ائتمک‬
اللرینی یئلله‌ییب،
"الوداع" دئییب گئتدین،
ایندی یورغون گؤزلرین
نیه یوللارا باخیر؟
هؤنکوروب آغلاماغی
گؤیلره سن اؤیرتدین،
-گؤرورسنمی، هله ده
ایستی یاغیشلار یاغیر.

درمه‌دیگین چیچکلر
گؤزلریندن شئه آلدی،
لاله‌لنمیش یاماجدان
سؤزلو بولاقلار آخیر.
او ماوی سمامیزدان
سنه بیر بولود قالدی،
-او بولوددان هله ده
ایستی یاغیشلار یاغیر.

گؤیلر سوسوب... بوشالما
سن گؤیلرین یئرینه،
کدرلی گؤزلرینده
هله ده شیمشک چاخیر.
سولغون گۆل قؤنچه‌سیتک
آچیلمیش اللرینه
گؤرورسنمی، هله ده
ایستی یاغیشلار یاغیر.

یئنه پاییز سارالیر،
سن نیه کؤورلیرسن؟
گۆنده بیر "واغزالی"یلا
هر بخته بیر گۆن دوغور.
خئییر-دوعا وئریرسن،
یالاندان دا گۆلورسن،
بس نیه گؤزلریندن
ایستی یاغیشلار یاغیر؟..

کۆلک اسیر، بوداقلار
اریییر یارپاق-یارپاق،
داغلارا دومان چؤکور،
سۆرونور آغیر-آغیر.
نه بو گؤیلر توختاییر،
نه دویور قارا تورپاق؛
گؤرورسنمی، هله ده ایستی یاغیشلار یاغیر.

یارپاقلار ساری یایلیق،
آغلاما، سیل گؤزونو،
اوچوردون سعادتی،
بویلانما فاغیر-فاغیر.
ایندی نملی بالیشا
سؤیکه‌ییبسن اۆزونو،
-گؤرورسنمی، هله ده
ایستی یاغیشلاریاغیر...

مای، ۱۹۷۷
داها بو یاغیشا اوتلار گؤیرمز،
داها بو یاغیشدا لاله‌لر سؤنمز.
بو یاغیش بولودون یۆکو دئییل کی،
بو یاغیش بیر سیمرغ تۆکو دئییل کی،
یاندیرسان عؤمور-گۆن قاییدا گئری،
ایندی اۆرگیمیز - کؤهنه یورد یئری،
تورپاغی نملیدیر،
داشی نملیدیر.
سئوگیمی اوچوروب بیر اۆمید کیمی
تورپاغی غملیدیر،
داشی غملیدیر...
سؽرسیرا آسیلیب گۆل بوداغیندان،
باهان ایتیردین،
یایی اؤتوردون؛
قؽش گلدی،
یاتمیسان فیل قولاغیندا...
بئله‌جه گۆن کئچدی،
زامان گئجیکدی،
گئجیکمیش ایستگی نه‌دی گؤیلرین؟
ایندیجه بولودلار تؤکوله‌جکدیر،
اۆرگی دولودور خاطیره‌لرین.
دیندیرسن،
تأسوف هؤنکوره‌جکدیر.
قؽوریلیب یاتیبدیر دولاما یوللار،
-بوینونا دولانار او ایلان کیرای.
دیمه،
قوی اویوسون نیسگیل آرزولار
یاساندان توتاجاق آییلان کیمی...
بو گؤز یاشلاری‌یلا،
بو یالواریشلا
یوللارین توزونو یاتیرماق اولماز،
کۆسولو ایللرین ایستکلرینی
داها منزیلینه چاتدیرماق اولماز.
یوماز کی دۆننی سئلله‌مه یاغیش،
باییلمیش دۆننه چیلله‌مه یاغیش...
گئجیکدی بیر آرزو،
گۆمان گئجیکدی.
گئجیکدی بیر یاغیش،
یامان گئجیکدی.
یاشادیق نیگاران، قولاغی سسده،
عؤموردن اؤتری جؽغیرلار کئچدی.
بیزیم اۆمیدیمیز آخیر نفسده
نه قدر چؽرپینسا
یئنه ده هئچدی...
داها اویانیشا گۆمان کی، یوخدو،
دئ، نه‌یه گرکدیر بو سون براعت؟
سندن بیر محبّت اومان کی، یوخدو.
او گۆونجلی داغلار مارالا قالدی،
او مخمر چمنلر سارالا قالدی،
واختیندا یاغمادی، نور چیله‌مه‌دی
بولودلار قارالا-قارالا قالدی...
منی بو گۆنونده سوراقلاما سن،
منی دۆننینده تاپارسان ایندی.
بو گۆنه قدرکی کدر منیمکی،
بو گۆندن سونراکی کدر سنیندیر.
قوومادین باشیندان
دومان گئجیکدی،
گئجیکدی بو یاغیش،
یامان گئجیکدی...
I
سئوگی هله عؤمور دئییل، عزیزیم،
قارشیدا ایللرین سؽناغی دورور.
هله باخیشلارین
چییینلردن سۆروشوب آخماغی وار،

هله بو سئوگی‌نین
سکسکه‌لی اوشاق کیمی
قارانلیقدان قورخماغی وار؛
سئوگی هله عؤمور دئییل، عزیزیم...

اؤتن گۆنلره الی چاتمایاندا،
تکلیکدن باغری چاتلایاندا
هامی باجارار سئومگی.
یاغاندا اۆستونه واختین آغیرلیغی،
قارالداندا گؤزلرینی
دیوارلارین آغلیغی
هامی باجارار سئومگی؛
سئوگی هله عؤمور دئییل، عزیزیم...

II
کؤهنه سئوگی‌سی‌یله اؤیونن قؽزلار،
ایندی یاد اۆرکده دؤیونن قؽزلار،
کیم ده بیلمه‌سه ده
سیز بیلیرسینیز،
باشینیزا گلیب،
دۆز بیلیرسینیز.
اؤزونوز بیر ائوه کؤچدونوز، آنجاق
قلبینیز باشقا بیر اۆرکده قالدی.
خاطیره‌یه دؤندو عهدینیز، آنجاق
یۆنگول عشقینیزی کۆلکلر آلدی؛
سئوگی هله عؤمور دئییل، ائله‌می؟..
هله بو سئوگی‌نین تردّودلرده
یئیین وورماغی وار،
سؽخیلماغی وار.
هله بو سئوگی‌نین گؤزلری باغلی
شؤهرت زیروه‌سیندن یؽخیلماغی وار.
آیاغا دورماغا گۆجون چاتماسا،
سعادت الیندن اگر توتماسا،
قاچیرسان فۆرصتی اگر اوو کیمی،
آتیلسان حیاتا بیر تیلوو کیمی
سئوگی هله عؤمور دئییل، عزیزیم...

III
محبّتله اؤپور داغی
بولاقلارین بوز دوداغی،
یاشاتماسا بیر بوداغی
بولاق هله عؤمور دئییل.

اودون یانماقدیر ماراغی،
کیبریتین اوددور یاراغی،
یاندیرماسا بیر چؽراغی
یانماق هله عؤمور دئییل.

گرکسیز یاناجاقدیسا،
قوروجا اود-اوجاقدیسا،
بولوددا قالاجاقدیسا
گۆنش هله عؤمور دئییل.

نه‌یه لازیم قولاق کارسا،
پارتلایاجاق اۆرک دارسا،
فیکری، دۆشونجه‌سی کورسا
گؤرمک هله عؤمور دئییل.
کۆل اۆفورمورسه هیجرانا،
اگر گۆلمورسه هیجرانا،
دؤزه بیلمیرسه هیجرانا
سئومک هله عؤمور دئییل!

یانوار، ۱۹۷۹
ساغلیقلار دئییلدی چؽغیر-باغیرلا،
اۆشوین قلبینه گیرن اولدومو!
گؤزوندن قلبینه دۆشن جؽغیرلا
آخان گؤز یاشینی گؤرن اولدومو!

ساغلیقلار اوزاندی...
سحره کیمی
چالیب-اوینادیلار، کئف ائیله‌دیلر،
چؽرپیب پیلله‌لره سون اۆمیدیمی
"واغزالی" اۆستونده دفن ائیله‌دیلر.

سون اۆمید!
او منیم گرییم ایدی...
یولونا شمع توتدو نئچه قؽز، گلین.
شام دئییل،
او منیم اۆرگیم ایدی،
سون دفعه یانیردی یولوندا سنین.

گئتدین...
او کؤهنه یول نور یولو ایدی،
ایزین دۆشن یئرده گۆل آچمادی کی؟
اؤزگه‌یله کئچیردین او یولو ایندی،
آیاغین آلتیندان یئر قاچمادی کی؟

بو یوللار نه یامان وفاسیز ایمیش،
نیه چیلیکلنیب تؤکولمه‌دیلر؟
دۆشوب قدمینه هر یوخوش، ائنیش
نیه اۆرگیمه چکیلمه‌دیلر؟..

باشینا گۆل-چیچک سپدیلر او گۆن،
آلیشان قلبینه سو سپمه‌دیلر.
"گئت" دئییب
آلنیمدان اؤپدولر او گۆن،
سؽنیق طالعینی دۆزلتمه‌دیلر...

گۆلدون...
گۆلوشونون عؤمرو چوخ قؽسا،
بیر حسرت آخیردی قانیندا سنین،
اوردا بۆتون یئرلر توتولموشدوسا
یئریم گؤرونوردو یانیندا سنین.

دۆنن تویون ایدی...
خوشبخت اولاسان!
گؤرونور بو بیزه قیسمت دئییلمیش.
اونوت!
ائله بیل کی،
سئودیگین اوغلان
گئتدیگین اوغلانمیش،
نۆصرت دئییلمیش...

سنتیابر، ۱۹۷۸
تکی وعده‌لشک،
آی عؤمروم-گۆنوم،
صاباحا بو قدر بدگومان اولما.
قطره اول،
یاخین اول، بس‌سن منیمچون
اوزاقدا گؤرونن بوز دومان اولما.
دایاناق اۆز-اۆزه ایکی ساحیل‌تک،
محبّت آرادا بیر عۆمّان اولسون.
باخیم گؤزلرینه گۆلومسه‌یرک،
سنی قوی وۆصالیم الیمدن آلسین.
تصادوف آرانی کسسه،
یئنه ده
دردیمی سنینله بؤله‌جگم من،
حیسّیمی، دویغومو بیر مکتوب ائدیب
سنین گؤروشونه گله‌جگم من.

یئنه سرحدلرده گۆلله آتیلیب،
عصبلر بیر تاریم سیم اولوب ایندی.
یئنه یوخولارا قورخو قاتیلیب،
تکی دینجلیک اولسون...
اولماسا، ایشدی -

بیزی آغوشونا آیریلیق آلسا،
آرایا سرحدلر دۆشه‌سی اولسا،
بیر حسرت بۆروسه گؤیو، یئری ده
قورخما...
محبّتیم ائله اودلودور،
اریدر تیکانلی مفتیل‌لری ده.
وطنچون،
سنینچون اودا دا دۆشسم
یوخ، یوخ آغلامارام،
گله‌جگم من.
الیمده بیر دسته ظفر چلنگی
سنین گؤروشونه گله‌جگم من.
عؤمروموز حیاتین قوللاری اۆسته
بعضاً اویاق اولور،
بعضاً مۆرگولو.
بیزیم هیجرانیمیز آنلار بۆکولو،
دۆشموشوک محبّت یوللاری اۆسته.
دورموشوق بیز ایکی یول آیریجیندا
بیرینده وۆصالدیر،
بیرینده حسرت...
سن وئر اللرینی بیر دسته گۆلتک
گؤتوروب دۆنیانی گزه‌جگم من،
وعده وئر، وعده وئر صاباح گؤروشک.
ایشیقلار سؤندومو،
گئجه کئچدیمی
چؽخیب قارانلیقدان بیر گۆنش کیمی
سنین گؤروشونه گله‌جگم من.

اوکتیابر، ۱۹۶۸
بو گۆن ده یولومدان ساخلادین منی،
یئنه ده ائیهاملار ایشینی گؤردو.
آز قالدی اۆرگیم یارا سینه‌می،
غضب قانادینی اۆستومه سردی...

بیر کدر دومانی منی بۆرودو،
یؽغدی گؤزلریمه نیفرتی، کۆلو.
اۆستونده هر جۆره داش-قاش وار ایدی
زرگر دۆکانی‌نین ویترینی کیمی.

ایترم گؤزوندن من ایلیم-ایلیم،
آتاندان دانیشما، هئچ یئری دئییل.
آتان کابینتده ناظیردی، گۆلوم،
منیم اۆرگیمین ناظیری دئییل.

ساختا شؤهرتلره دۆشمنم، یادام،
سیم و زر گؤرورم غایه‌نده سنین.
بیر ده حقیقتی بیل کی،
من آدام
اولماق ایسته‌میرم سایه‌نده سنین...

دۆنیانی گؤرموشم ائله بیر دوندا،
دئمیرم سئوینجدن درد بؤیوک اولوب،
سنین جیبلرینه پول یۆک اولاندا
منیم جیبلریمه الیم یۆک اولوب!..

یوخ، یوخ!
وارلی اولماق عیب دئییل کی،
بیلیرم، پولونوز حسابا گلمز.
سنی ایستگیمجه سئومه‌سم، بیل کی،
آتان امر وئریب سئودیره بیلمز.

آیریلاق،
اونوداق کدری، یاسی،
کؤنلوم دئدیگینی سؤیله‌ییر دیلیم.
سنی ناظیرلیگین قارا «وولقا»سی،
منیسه احتیاج گؤزله‌ییر، گۆلوم...

۱۹۶۸
سن گرک اؤزونو تانیتمایایدین،
منه بو اۆزونو تانیتمایایدین.
یئنه ده حیاتی سندن اومایدیم،
ائله بیله‌یدیم کی، دۆنیادا تکسن.

ایللرین عؤمرومدن آپاردیغینی
ائله بیله‌یدیم کی، گتیره‌جکسن.
باهار گؤزله‌ییردیم،
یئنه ده قؽشدی،
بیر آرزو، بیر اۆمید اؤلدورمکدنسه
آلدانا-آلدانا یاشاماق خوشدو؛
سن گرک اؤزونو تانیتمایایدین...
سنه باخا-باخا سنین اۆزونده
گؤرونور اؤزگه‌نی سئومیشم اوندا.
هر تیترک سؤزومو سنین گؤزونده
یقین اؤزگه‌سینه دئمیشم اوندا.

حیسّین خوماریندا یوموب گؤزونو
اوندا محبّتیم یوخولو ایمیش.
سونرادان اویانیب،
اوندا بیلیب کی،
سویون لال آخانی قورخولو ایمیش؛
سن گرک اؤزونو تانیتمایایدین.

سن گرک اؤزونو تانیتمایایدین؛
عؤمور ده بئله‌جه کئچیب گئده‌یدی.
سن دئمه، مارالا آتدیغیم گۆلله
مارال دری‌سینده تۆلکویه دیدی...
ساده‌لؤوح قلبیمدن،
محبّتیمدن،
کئچدیگیم یوللاردان اوتانیرام من؛
یوخولو گؤزومدن آغریلار کئچیر،
یانیمدان سئوگی‌سی دوغرولار کئچیر،
سندن یوخ،
اونلاردان اوتانیرام من...
سن گرک اؤزونو تانیتمایایدین،
منه بو اۆزونو تانیتمایایدین...

۱۹۷۹
اونوتمادی گؤزلرینی گؤزلریم،
منیم گؤزوم، سنین گؤزون دئییل کی.
او یئرلری ناخیشلاییر ایزلریم،
منیم ایزیم، سنین ایزین دئییل کی.

یالانلارا اؤیرتمه‌دیم دیلیمی،
منیم دیلیم، سنین دیلین دئییل کی.
هر یئتنه اوزاتمادیم الیمی،
منیم الیم، سنین الین دئییل کی.

اوچوب گئتدین، سازاق دۆشدو کؤنلومه،
منیم قلبیم، سنین قلبین دئییل کی.
سن گۆلوشچون یارانیبسان، اینله‌مه،
منیم قلبیم، سنین قلبین دئییل کی.

سن قارالتدین، من آغارتدیم ساچلاری،
منیم ساچیم، سنین ساچین دئییل کی.
ائشیدنلر باغیشلایار سوچومو،
منیم سوچوم، سنین سوچون دئییل کی.

یئره دۆشدو، اودلو سؤزوم کؤزردی،
منیم سؤزوم، سنین سؤزون دئییل کی.
قارشیلاشدیق، دیل سوسدو، اۆز قؽزاردی،
منیم اۆزوم، سنین اۆزون دئییل کی.

سن یولونو دییشدیردین بیر سحر،
منیم یولوم، سنین یولون دئییل کی.
بو هیجرانا دؤزه‌جگم بیرتهر،
دؤزه‌جگم، هیجران اؤلوم دئییل کی!..

فئورال، ۱۹۸۲
گل دئدیم، کؤکسومه یارالی دۆشدو،
ال آچدیم، اللریم آرالی دۆشدو،
اونا بو آغ دۆنیا قارالی دۆشدو،
بیر سئودا آغلاییر ایچیمده منیم.

قدری بیلینمه‌دی،
عؤمرو قؽریلدی،
حسرت بویون بۆکدو،
هیجران یورولدو.
او هر گۆن اینجیلدی،
هر گۆن وورولدو،
بیر سئودا آغلاییر ایچیمده منیم.

مین گۆل سولدورانلار
مین گۆل دردیلر،
یۆنگول چیچکلری
یۆنگول دردیلر،
من اۆرک آچاندا
باخیب گؤردولر
بیر سئودا آغلاییر ایچیمده منیم...

دۆننی بۆکولو خاطیره‌سینه،
وورغوندور بو گۆنو خاطیره‌سینه،
قؽسیلیب مۆرگولو خاطیره‌سینه
بیر سئودا آغلاییر ایچیمده منیم.

باجارا بیلمه‌دیم اؤزوم-اؤزومله،
دیل تاپا بیلمه‌دی ایشیم سؤزومله،
منیم فریادیملا،
منیم گؤزومله
بیر سئودا آغلاییر ایچیمده منیم.

منم داش داشی‌یان او محبّته،
ایتمیش قاش-داشی‌یام او محبّته،
اؤزوم باش‌داشی‌یام او محبّته،
بیر سئودا آغلاییر ایچیمده منیم.

گئج اولدو قدرینی من بیلنده ده،
سئوینجی یاشاییب، غم بؤلنده ده
اۆزومه باخمایین،
من گۆلنده ده
بیر سئودا آغلاییر ایچیمده منیم...
بو تبسّوم بیر چیچگین ایزیدی،
آلا گؤزون بولاقلارین گؤزودو،
اۆرگیمده محبّتین اؤزودو،
اۆرگیمله باجارمیرام، نئیله‌ییم؟

هر ائیهامین بیر تیلسیمه آچاردی،
دیل بیلسه‌یدی داش دا کؤنول آچاردی.
عاقلیم سندن اوزاقلاشار، قاچاردی،
اۆرگیمله باجارمیرام، نئیله‌ییم؟

بو اۆلفتین سونو هیجران دئییل کی،
دیلیم توتمور ایسته‌ییمی دئییم کی.
سنه گلن یوللاریمی اییم‌می؟
اۆرگیمله باجارمیرام نئیله‌ییم؟

گؤزله‌ییرم...
هر دقیقه‌م ایل اولور،
سن گلیرسن، هر لپیرین گۆل اولور.
قلبیم یئنه قولو باغلی قول اولور،
اۆرگیمله باجارمیرام، نئیله‌ییم؟

اوشاقلیغین هاواسی وار باشیندا،
اۆرگیمین خنجری وار قاشیندا.
دئ، سئویم‌می من ایندی بو یاشیمدا؟
اۆرگیمله باجارمیرام، نئیله‌ییم؟
عؤمور-گون یولداشیما

فیکیرلی گلیرم،
دالغین گلیرم،
قایغیلی گؤزلرین چکیر شکلیمی.
بعضاً گئج گلیرم،
یورغون گلیرم
بیتیرسن قاپیدا بنؤوشه کیمی...

بلکه مین سوچومو بیلمیسن منیم،
بیرینی اۆزومه وورمامیسان هئچ.
ائیهاملا اۆزومه گۆلموسن منیم،
بیرجه یول اۆزومه دورمامیسان هئچ.

هر کس طالعیله گلیر حیاتا،
دئمیرم، اۆرگی یومشاق اولموشام.
دجل بالالارا مۆلاییم آتا،
سنینچون ان دجل اوشاق اولموشام.

سنسن داغلار" کیمی صبرله دؤزن،
بلکه تردّودله چوخ دؤیوشموسن.
ایستی بیر سئوگیدن یازمیشام بعضاً،
سویوموش چاییمی سن دییشمیسن...

اۆزومده کدردن بیر ایز گؤرنده
شیرینیم اولموسان،
آجیم اولموسان.
قوهومدان، تانیشدان پیس اۆز گؤرنده
سن آنام اولموسان،
باجیم اولموسان.
بیر کؤورک شعریمدن گؤزلرین دولوب،
نه دئییم،
اؤزگه‌دن چوخ یازیب قلم،
نه قدر دۆگونلو گۆنوموز اولوب،
دۆگونلو قاشین گؤرمه‌میشم من...

بیر الین مطبخده
قابدا-قاشیقدا،
بیر گؤزون ایستیده، تۆستوده اولوب.
بیر الین بئشیکده
اوغول-اوشاقدا،
بیر گؤزون همیشه اۆستومده اولوب.

یوللار چارپاز-چارپاز،
یوللار قاریشیق...
گئجه یول گلیرم قولاغی سسده.
بیزیم پنجره‌دن سۆزولن ایشیق -
گؤزونون نورودور یولومون اۆسته.

فیکیرلی گلیرم،
دالغین گلیرم،
قایغیلی گؤزلرین چکیر شکلیمی.
بعضاً گئج گلیرم،
یورغون گلیرم
بیتیرسن قاپیدا بنؤوشه کیمی...

* * *

قاپینی دؤیموشم گئجه‌یاری‌سی،
ساچیمدا بیر الین تماسی گلیب
ایستی دوداغیمدا بیر اؤپوش ایزی،
الیمده بیر ساجین خؽناسی گلیب.

یوخولو گؤزونده قؽزارتی گؤروب،
قؽزارا-قؽزارا یالان دئمیشم.
شۆبهه‌نین بهانه پایینی وئریب،
هله یاتماییب کی، بالام، دئمیشم.

تئز-تئز اویناییرام من بو اویونو،
نئچه یاد صیفتی گؤروب گلیرم.
سنین بیر عؤمورلوک سئوگی پایی‌نین
یاری‌سین اؤزگه‌یه وئریب گلیرم.

بو ائله دویغو کی،
بو ائله غم کی،
مین اولسا یئنه ده اَیمزدی سنی.
بعضاً ائله‌سینه دییشمیشم کی.
بلکه دؽرناغینا دیمزدی سنین.

پنجره دالیندان یوللارا باخیب،
یوخوسوز گؤزونله واختی ساییرسان.
کؤرپه بالالاری کؤکسونه سؽخیب
مۆرگولو-مۆرگولو گۆلومسه‌ییرسن.

ناغیل دانیشیرسان "مین بیر گئجه"دن،
ناغیلین قورخولو، سِحرلی، غمگین...
من ایسه ساللانیب کندیر گئجه‌دن
بیر قویو دیبینه ائنیرم هر گۆن.

بیلمیرم ملکسن، الله‌سان، نه‌سن؟
منه باغیشلادین نئچه گۆناهی.
بئله مهریبانلیق ائیله‌دیکجه سن
اؤزوم اؤز گؤزومدن دۆشورم، آخی...
اؤتوب ایللر کئچیر، اؤتور قرینه،
آرزوم یولا دۆشور منیم یئریمه،
دۆنیانین سعادت زیروه‌لرینه
تلسیب، همیشه گئجیکن منم.

مین سوراق گتیرن کۆلکلر اۆچون،
محبّت یوواسی اۆرکلر اۆچون،
منیمچون آچیلان چیچکلر اۆچون
تلسیب، همیشه گئجیکن منم.

زامان اوچوب گئدیر، گؤزله‌میر یئنه،
یاغیشلار تلسیر قوووشسون سئله،
اوّلدن بیلدیگیم سفره بئله
تلسیب، همیشه گئجیکن منم.

هیجران قاپیمیزی دؤیمه‌یه‌یدی کاش،
ایللر گنجلیگیمه دویمه‌یه‌یدی کاش،
سئونلر هئچ زامان
دئمه‌یه‌یدی کاش،
-تلسیب، همیشه گئجیکن منم.
دلی کیمی سئودیم گؤزل دلینی،
گۆل وئردیم، یاندیریب-یاخدی الینی،
سئچیب ج‍ۆمله‌لرین ان گؤزلینی
تیتره‌ییب سؤیله‌دیم سؤزومو سنه،
سئودیره بیلمه‌دیم اؤزومو سنه...

حسرتی، وۆصالی قوشا سئودیردیم،
اۆشوین اینیمی قؽشا سئودیردیم،
یالین آیاغیمی داشا سئودیردیم،
تانیدا بیلمه‌دیم ایزیمی سنه
سئودیره بیلمه‌دیم اؤزومو سنه...

آلیشیب یاناردیم گؤز ایسته‌سه‌یدین،
بیر نغمه اولاردیم سؤز ایسته‌سه‌یدین.
منی گؤرمک اۆچون گؤز ایسته‌سه‌یدین
کور قالیب، وئرردیم گؤزومو سنه؛
سئودیره بیلمه‌دیم اؤزومو سنه.

سنه هر مکتوبو یازدیم قانیملا،
روحوملا، حیسّیمله، هیجانیملا،
سئوینجله اؤلردیم،
اگر بونونلا
باغیشلاسایدیم من
عؤمرومو سنه؛
سئودیره بیلمه‌دیم اؤزومو سنه...
بیز خوشبخت اولمادیق سئونلر کیمی،
ایندی سون باهارتک سؽزلار قلبیمیز.
بلکه بو دۆنیایا گلمیشیک، گۆلوم،
آرتیراق دۆنیایا حسرتینی بیز.

طعنه ده، گیلئی ده داها عبثدیر،
بو سیرلی رویادان آییلاق گرک.
یا سن گئجیکمیسن، یا من
تلسدیم،
ایندی سئوه-سئوه آیریلاق گرک.

کؤنول گیزلی-گیزلی
یاناجاق ایندی،
بیر داملا گؤز یاشین دنیزدی منه.
بیزه خاطیره‌لر قالاجاق ایندی،
سنین خاطیره‌ن ده عزیزدیر منه...

بیلیرم، بو حسرت اۆزه‌جک سنی،
چالیش، کؤلگه کیمی سۆرونمه‌یه‌سن.
گؤزلریم هر زامان گزه‌جک سنی،
چالیش،
گؤزلریمه گؤرونمه‌یه‌سن!...
سئودیگیمیز بیر نغمه وار...
بو سئوگیدن سن قورخورسان
عئیبی یوخ،
من سئورم ایکیمیزین یئرینه.
بو عشق اۆچون بیر گۆن
دارا چکسه‌لر
من گئدرم ایکیمیزین یئرینه...
مین عذابدیر سنسیز کئچن
هر گۆنوم،
اونوتموشام یاخشی، یامان فرقینی.
بو سئوگی‌نین داغ اریدن دردینی
من چکرم ایکیمیزین یئرینه.

گۆل دئییرم، گۆل قلبینه دییرم،
من سنینچون تانری یازان شعرم،
دوداقلارین اینجیمه‌سین دئییرم،
-من اؤلرم ایکیمیزین یئرینه...

طالعیمده سون آچیلان گۆلومسن،
سۆزوب قارا گؤزلرینی گۆلومسه،
بو سئوگی‌نین سونو اگر اؤلومسه
من اؤلرم ایکیمیزین یئرینه.
او یالانچی ایللر گۆنه دیمزمیش،
گۆل وئردیم، وئردیگیم گۆله دیمزمیش،
گؤزومده چاغلایان سئله دیمزمیش،
حئیف او سئوگی‌یه، او محبّته.

بیر دفعه اۆرکدن گۆله بیلمه‌دیم،
کؤنلومو کیمسه‌یه وئره بیلمه‌دیم،
سندن باشقاسینی سئوه بیلمه‌دیم،
حئیف او سئوگی‌یه، او محبّته.

سنسیز گئجه‌لریم یوخو بیلمه‌دی،
ایچیمده آلیشان آهی بیلمه‌دی.
من بیلدیم، سن بیلدین، چوخو بیلمه‌دی،
حئیف او سئوگی‌یه، او محبّته.

اؤزومون اؤزومدن آجیغیم گلیر،
دوستلاریم کدرلی، دۆشمنیم گۆلور.
اؤلن سئوگیمیزه یازیغیم گلیر،
حئیف او سئوگی‌یه، او محبّته.

سولطانلیق تاختیمیز دئوریلدی نئجه،
کۆلکسیز، توفانسیز سوورولدو هئچه.
او سئوگی نیفرته چئوریلدی نئجه،
حئیف او سئوگی‌یه، او محبّته.
قاییدیب گلیبسن گؤزلری یاشلی،
دئییرسن، بیر داها کۆسن دئییلسن.
هانی او وۆقارین، او سایمازلیغین؛
یوخ، بو سن دئییلسن، بو سن دئییلسن.

دئییرسن واخت کئچیر، زامان گؤزله‌میر،
دیلین دئدیگینی، اۆرگین دئمیر.
بو یالواران گؤزل سنه بنزه‌میر،
یوخ، بو سن دئییلسن، بو سن دئییلسن.

گئتدیگیم هر یئری گۆدن سن ایدین،
کۆسنده آیلارلا ایتن سن ایدین،
چؽرپیب قاپیلاری گئدن سن ایدین،
یوخ، بو سن دئییلسن، بو سن دئییلسن.

دئییرسن کۆسنلر باریشار یئنه،
نه تئز بویون ایدین بئش گونلوک غمه؟
اؤزوندن راضیلیق یاراشیر سنه
یوخ، بو سن دئییلسن، بو سن دئییلسن.

دردلیسن، دردینی گئت دانیش سویا،
ال آچما، آلچالما من وئرن پایا،
ائله بیل دیلنچی گلیب قاپی‌یا
یوخ، بو سن دئییلسن، بو سن دئییلسن.

دئکابر، ۱۹۹۵
ایکیمیزده بیر اۆرک وار.
یاری منده، یاری سنده.
سئوگی آدلی بیر آغاجیق،
بوداق منده، ناری سنده.

چیچک عطری گۆل اۆزونده،
مین معنا وار هر سؤزونده.
بیر بولودوق گؤی اۆزونده
یاغیش منده، دولو سنده.

بیر اووچویام، گۆنوم اوودا
قاچهاقاچدا، قووهاقوودا،
عشقیمیز بیر شیرین سئودا
پتک سنده، بالی منده...