دۆنیا غفیل ایشیقلانسا

غفیل گۆن دوغسا بیر گئجه،
دۆنیا دۆم آغ ایشیقلانسا؛
شهر-شهر، کۆچه-کۆچه،
اوتاق-اوتاق ایشیقلانسا،
گؤرریک کیملرین الی
کیملرین جیبیندن چؽخیر.
کیملر اییله-اییله
کیملرین ائویندن چؽخیر.

غفیل گۆن دوغسا بیر گئجه،
مین-مین گیزلی گۆناه گؤرسک،
اۆستونو اؤرته بیلمه‌سه،
بو دۆنیانی چؽلپاق گؤرسک،
باشیمیزا هاوا گلر،
آغلیمیز چاشار بلکه ده.
هامی بیردن باش گؤتوروب
دۆنیادان قاچار بلکه ده.

بو دۆنیادا بس کیم قالار،
کیم بؤیودر، اوشاقلاری؟!.
...نه یاخشی کی، بو دۆنیامیز
یاواش-یاواش ایشیقلانیر...