گیزلنر

او نئجه قوش ایدی، یاز گلر باغا،
سینه‌می چکیبلر دۆگونه، داغا.
بیر شانا، بیر بافتا، بیر ده بیر جؽغا،
بو اۆچو بیر اولسا، تئلده گیزلنر.

او نئجه قوش ایدی، قایادا سکر،
قایناغی نشتردیر، قانیمی تؤکر،
بیر نوغول، بیر نابات، بیر ده بیر شکر،
بو اۆچو بیر اولسا، دیلده گیزلنر.

او نئجه قوش ایدی، آناسین امر،
هاوادا دؤور ائدر شمس ایله قمر،
بیر قؽلینج، بیر خنجر، بیر ده بیر کمر،
بو اۆچو بیر اولسا، بئلده گیزلنر.

آلادیر گؤزلری، شهلای-نرگیز،
سنین تک بیر گؤزل بولونماز هرگیز،
بیر بولاق، بیر حووض، بیر ده کی کهریز،
بو اۆچو بیر اولسا، یئرده گیزلنر.

یار کی، یارا شیرین وئرر سلامی،
طبیبیمسن، اؤزون باغلا یارامی،
بیر اوغرو، بیر اَیری، بیر ده حارامی،
بو اۆچو بیر اولسا، کولدا گیزلنر.

خسته قاسیم دئیر، لبی باللی قؽز،
بیر شیرین گوفتارلی، اۆزو خاللی قؽز،
بیر قلم، بیر داوات، بیر ده بیر کاغیذ،
بو اۆچو بیر اولسا، الده گیزلنر.