وکیل
حقسیزه حقلی دئییب، بیر چوخ گۆناها باتمیشام.
حکیم
دردی تشخیص ائتمهییب، قوم-اقربا آغلاتمیشام.
تاجیر
من حلال ایله حرامی بیر-بیرینه قاتمیشام.
رؤوضه-خان
اۆمّتین پولون آلیب، من گؤزلرین ایسلاتمیشام.
درویش
نئرده بولسام سوق آچیب، مین-مین یالان سؤز ساتمیشام.
صوفی
روز و شب حق-حق دئییب، من هر کسی اویناتمیشام.
موللا
گۆنده بیر فیتوا وئریب، مخلوقو چوخ آلداتمیشام.
علم
قطعی-اۆممید ائتمیشم، یئکسر بو قومی آتمیشام.
جهل
اورتادا کئیف ائیلهییب، من هم مرامه چاتمیشام.
شاعیر
بۆلبوله، عشقه، گۆله دایر یالان فؽرلاتمیشام.
عوام
آنلامام هرگیز، جهالت بسترینده یاتمیشام.
قزئتهچی
من جریدهم دولماق اۆچون مطلبی اوزاتمیشام.
اؽلک دفعه «موللا نصرالدّین» ژورنالیندا (10 فئورال، ۱۹۰۶، № 33) «م.مؤحتمیل» ایمضاسی ایله چاپ اولونموشدور.