سؤز

ازل باشدان آچاریدیر سیرلرین،
اؤز گۆجونو اۆرکلردن آلار سؤز.
اۆمید وئرر، سئوینج وئرر، غم وئرر،
مۆشکول اولان درده چاره قؽلار سؤز...

ایلک همدمدیر، ایلک سیلاحدیر هر کسه،
اگر کی، او صاف پولاددان دئییلسه.
هر کلمه‌سی اؤز یئرینده دئییلسه،
قؽلینجلاردان داها کسکین اولار سؤز.

سؤز اوجالدار بو جاهاندا اینسانی،
عزیزله‌یر بو جاهان دا اینسانی.
واخت اولار کی، بیرجه آندا اینسانی،
اللی ایلین حؤرمتیندن سالار سؤز.

چالیش، نبی، گئجه-گۆندوز یارات سن،
بد سؤزلری اؤز سینه‌ندن یار، آت، سن.
اینجی سئچیب، دۆرّ توپلاییب یاراتسان،
سندن ائلده بیر نیشانه قالار سؤز.

۱۹۴۴