بیر داغ کلی یارالادیم زیروهده
بیر داغ کلی یارالادیم زیروهده
باش تیترهدی، آیاق اسدی، داش آخدی.
بیر جانلینی جاندان سالدی بیر زده
ایکی گؤزدن ایکی داملا یاش آخدی.
دۆشونمهدیم، آنادیر، یا بالادیر،
اووچو آتار اوو برهدن کئچنده
آلا تولا قانلی داشی یالادی،
او سؤنوردو تیکانلیغین ایچینده.
قاباقلاشدیق سؤکولمهمیش قؽزیل دان،
من سیلاحلی، او سیلاحسیز بو یئرده.
یارییولدا آیری دۆشدو قاتاردان،
من گۆناهلی، او گۆنهاسیز بو یئرده.
اؤز حالینا تکجه اؤزو آغلادی،
کیمی وار کی، کیم دایانا یانیندا.
دیل اوزادیب، نم تورپاغی یالادی،
سومو کئچدی خیالیندان سون آندا.
دوداق یانیر، یاناق یانیر، اۆز یانیر،
بولودومو، دومانیمی ایلهسین؟
بویلاندیقجا باخیش یانیر، گؤز یانیر،
بو یانغییلا سئللر، سولار نئیلهسین؟
آغیر-آغیر دارتیب بۆکدو دیزینی،
مونجوقلادی کیرپیکلرده دونان تر.
ایندن بئله توز باساجاق ایذینی،
ایندن بئله نه یۆروش وار، نه سفر.
بیردن-بیره ائله چؽرپدی اؤزونو،
ساغ بوینوزو قوپوب قالدی قایادا.
ای حسین، مۆختصر ائت سؤزونو،
بو قان سنی توتاسییدی، توتدو دا.