شعر عاشقانه ترکی

منی جاندان اوساندیردی، جفادن یار اوسانمازمی؟
فلک‌لر یاندی آهیمدن، مرادیم شمعی یانمازمی؟
قامو بیمارینه جانان دوای درد ائدر احسان،
نه‌چون قیلماز منه درمان، منی بیمار سانمازمی؟
غمیم پنهان توتاردیم من، دئدیلر یاره قیل روشن،
دئسم، اول بیوفا بیلمن، اینانارمی، اینانمازمی؟
شب هجران یانار جانیم، تؤکر قان چشم گریانیم،
اویادار خلقی افغانیم، قارا بختیم اویانمازمی؟
گلِ رخسارینه قارشو گؤزومدن قانلی آخار سو،
حبیبیم، فصل گل دور بو، آخار سولار بولانمازمی؟
دئگیلدیم من سنه مایل، سن ائتدین عقلیمی زایل،
منه طعن ایله‌ین غافل سنی گؤرجک اوتانمازمی؟
فضولی رند و شیدادیر، همیشه خلقه رسوادیر،
سورون کیم، بو نه سئودادیر، بو سئودادن اوسانمازمی؟

اؤیله سرمستم کی، ایدراک ائتمزم دنیا نه‌دیر،
من کیمم، ساقی اولان کیمدیر، مئی و صهبا نه‌دیر.
گرچی جاناندان دل شئیدا ایچون کام ایسترم،
سورسا جانان، بیلمزم کام دل شئیدا نه‌دیر.
وصلدن چون عاشقی موستغنی ائیلر بیر وصال،
عاشقه معشوقدن هردم بو ایستیغنا نه‌دیر؟
حکمت دنیا و مافیها بیلن عارف دئگیل،
عارف اولدیر، بیلمه‌یه دنیا و مافیها نه‌دیر.
آه و فریادین، فضولی، اینجیدیبدیر عالمی،
گر بلای عشق ایله خوشنود ایسن، غوغا نه‌دیر؟

توتولموش کونلوم جام ایله شادان ایلمک اولماز
ال ایلن پسته نین آغزینی خندان ایلمک اولماز

نه سوز دوربو که اولسون صاحب مشرب قوری زاهد
قرا توپراغی هرگز آب حیوان ایلمک اولماز

بولوت قیلان کسر جولان ایدنده ایلدیریم تیغی
کونوللر پرده سینده عشقی پنهان ایلمک اولماز

منیم گوزیاشیمی چیقگیل فلک لردن تماشا قیل
حبابی قصرلر ایچینده طوفان ایلمک اولماز

قلیج گر ایچسه عالم قانینی سیرابلیق بیلمز
سنی عشاق قتلیندن پشیمان ایلمک اولماز

من مجنونی عاقل ایلمک ممکن دگول ناصح
سوز ایلن مشک ناب اولان قانی قان ایلمک اولماز

خطادن کیچدی جیران قانینی مشک ایلدی صائب
دیمه عصیانی طاعت، کفری ایمان ایلمک اولماز

دیلبرا، عشقین تنیمده سئوگیلی جاندیر مانا،
پرتو-مهر-روخین خورشید-تاباندیر مانا.

درد-هیجریندن سنین هرگیز شیکایت قیلمازام،
هیچ علاج ائتمن طلب، نئیچون کی، درماندیر مانا.

آسیتانین خاکینی وئرمن جمیع-عالمه،
هر آیاغین توپراغی مولک-سلیماندیر مانا.

تا جمالین موصحفین گؤردوم، ایا نور-الٰه،
ذیکر-عشقین دیلده دایم ویرد-قرآندیر مانا.

ائی خطایی، خوبلارین جؤوری وفادیر عاشیقه،
فیرقتی مهر نیگارین، جؤوری احساندیر مانا.

یا رب، بلای عشق ایله قیل آشنا منی!
بیر دم بلای عشقدن ائتمه جدا منی!
گئتدیکجه حسنون ایله زیاده نگاریمین،
گلدیکجه دردینه بتر ائت مبتلا منی!
من خاندان و ملازمت اعتبار و جاه،
قیل قابل سعادت فقر و فنا منی!
آز ائیله‌مه کل عنایتینی اهل درددن،
یعنی کی، چوخ بلا لره قیل مبتلا منی!
تمکینیمی بلای محبتده قیلما سُست،
تا دوست طعن ائدیب دئمه یه بیوفا منی!
اؤیله ضعیف ایله تنیمی فرقتینده کیم،
وصلینه ممکن اولا یئتیرمک صبا منی!
اولدوقجا من، گؤتورمه بلادن ارادتیم،
من ایسترم بلانی، چو ایستر بلا منی!
نخوت قیلیب نصیب فضولی کیمی منه،
یا رب، مقید ائیله‌مه مطلق مانا منی!

یئنه او باغ اولایدی، یئنه ییغیشاراق سیز
او باغا کؤچه‌یدینیز.

بیز ده مورادیمیزجا فلکدن کام آلایدیق،
سیزه قونشو اولایدیق.

یئنه او باغ اولایدی، سنی تئز-تئز گؤره‌یدیم،
قلمه سؤز وئره‌یدیم،

هر گون بیر یئنی نغمه، هر گون بیر یئنی ایلهام...
یازایدیم سحر-آخشام.

آرزویا باخ، سئوگیلیم، تئللریندن اینجه‌می؟
سؤیله، اورگینجه‌می؟

یئنه او باغ اولایدی، یئنه سیزه گله‌یدیک،
دانیشایدیق، گوله‌یدیک.

اورکک باخیشلارینلا روحومو دیندیره‌یدین،
منی سئویندیره‌یدین.

گیزلی صؤحبت آچایدیق روحون احتیاجیندان،
قارداشیندان، باجیندان

چکینه‌رک چوخ زامان صؤحبتی دگیشه‌یدین،
منیمله اییشه‌یدین.

یئنه ده بیر وورایدی قلبیمیز گیزلی-گیزلی،
سن ای اسمر بنیزلی!

بو یاز بیر باشقا یازدیر، بو یاز داها دا خوشدور،
وای او قلبه کی، بوشدور!

هر اوفوقده بیر هوس، هر بوجاقدا بیر اومود،
اینسانلار داها مسعود،

دویغولار داها اینجه، فیکیرلر داها درین،
اورکلر داها سرین.

اینسانلارین ووقاری، طلبی داها یوکسک.
یولوموزدان داش-کسک

تمیزلنمیش بیر آز دا. ائللرین کئیفی سازدیر،
بو یاز بیر باشقا یازدیر!

یئنه او باغ اولایدی، یئنه او قوملو ساحیل،
سولار اؤتیدی دیل-دیل.

ساچین کیمی قیوریلان دالغالارا دالایدیم،
دالیب ایلهام آلایدیم.

اندامینی هوسله قوجاقلارکن دالغالار،
قلبیمده قاسیرغالار،

فیرتینالار جوشایدی، قیسقانجلیقلار دوغایدی،
منی حیرصیم بوغایدی؛

جوموب آلایدیم سنی دالغالارین الیندن،
یاپیشایدیم بئلیندن،

خیالیمیز اوزه‌یدی سئودا دنیزلرینده،
لپه‌لر اوزرینده،

ایلهامیمین یئلکه‌نی زرّین ساچین اولایدی،
سولار خیرچین اولایدی.

بو نه گؤزل شعردیر، بو نه گؤزل منظره،
گلین، باخین خزره.

چیخالیم بوزوونادا کیچیک قایالیقلارا،
سئیر ائده‌لیم بیر آرا...

گئجه‌لر سایریشارکن اولدوزلار لاله کیمی،
ایشیقلار ژاله کیمی

چیلنیب داغیلارکن اطرافا داملا-داملا،
ان یاخین بیر آداملا

نه گؤزلدیر دینله‌مک سولارین نغمه‌سینی،
طبیعتین سسینی!

نه گؤزلدیر دولاشماق ایستی یای فصیللری
بو سرین ساحیللری!

نه گؤزلدیر سحرلر بیزیم بؤیوک روحوموز،
آشیب-داشان دویغوموز،

شکلینده‌کی سولاردان باخاراق لذّت آلماق،
بو ماوی شعره دالماق،

دالغالار کیمی قالخماق، دالغالار کیمی ائنمک،
بعضاً حورکوب چکینمک.

هر دالغا بیر کیشنه‌‌ین بیاض یاللی آت کیمی،
بیزیم بو حیات کیمی!

یئنه او باغ اولایدی سئودالار اؤلکه‌سینده،
او سؤیود کؤلگه‌سینده،

اینجی قوملار اوستونده یئنه وئریب باش-باشا،
یایی وورایدیق باشا.

گونلریمیز کئچه‌یدی قیزغین فرحلر کیمی،
دولو قدحلر کیمی؛

یارپاقلار آراسیندان اوزاداراق الینی،
اوخشایاراق تئلینی،

گئجه‌لر دارایایدی ساچلارینی، آی گؤزل!
سن گؤزلسن، آی گؤزل؟

اللرینده اللریم، گؤزلرینده گؤزلریم...
آسیلایدی سؤزلریم

کؤنلونون قولاغیندان بیر قیزیل تانا کیمی،
گونش دوغانا کیمی.

بو یاز دوستلاریم بیر آز بختور اولاجاقلار،
جان-جیگر اولاجاقلار.

بیر آز دا اوزاقلارا آچاجاقلار یئلکه‌نی،
روح یئنی، حیات یئنی...

چیخاجاقلار – گؤیلری آشاراق دؤنه-دؤنه –
بولودلارین فؤوقونه.

اوچاجاقلار صاباحا، اوچاجاقلار یارینا،
ائفیر بوشلوقلارینا.

واختیله بیر کؤلگه تک حور یاشاماق ایسته‌ین
بو اینسان اوغلو بیلسن

آزادلیق اؤلکه‌سینده داها شاد اولاجاقدیر،
دونیا داد آلاجاقدیر.

یئنه او باغ اولایدی، یئنه ییغیشاراق سیز
او باغا کؤچه‌یدینیز.

بیز ده مورادیمیزجا فلکدن کام آلایدیق،
سیزه قونشو اولایدیق.

یئنه او باغ اولایدی، سنی تئز-تئز گؤره‌یدیم؛
قلمه سؤز وئره‌یدیم.

هر گون بیر یئنی نغمه، هر گون بیر یئنی ایلهام...
یازایدیم سحر-آخشام.

آرزویا باخ، سئوگیلیم، تئللریندن اینجه‌می؟
سؤیله، اورگینجه‌می؟

اونلار گوروشدولر

 آیلی گئجه ایدی

اوغلان پیچیلتیلا سئویرم دئدی

عهدیندن دونه نین گوزو اویولسون

آی دا عشقیمیزه قوی شاهید اولسون 

اونلار آیریلدیلار

آیلی گئجه ایدی

اوغلان باشقاسینا سئویرم دئدی

آی گیردی بولودا

اوزونده کدر

قورخدو کی یئنه ده شاهید چکه‌لر

او یالانچی ایللر گونه دیمزمیش،
گول وئردیم، وئردیگیم گوله دیمزمیش،
گؤزومده چاغلایان سئله دیمزمیش،
حئیف او سئوگی‌یه، او محبّته.

بیر دفعه اورکدن گوله بیلمه‌دیم،
کؤنلومو کیمسه‌یه وئره بیلمه‌دیم،
سندن باشقاسینی سئوه بیلمه‌دیم،
حئیف او سئوگی‌یه، او محبّته.

سنسیز گئجه‌لریم یوخو بیلمه‌دی،
ایچیمده آلیشان آهی بیلمه‌دی.
من بیلدیم، سن بیلدین، چوخو بیلمه‌دی،
حئیف او سئوگی‌یه، او محبّته.

اؤزومون اؤزومدن آجیغیم گلیر،
دوستلاریم کدرلی، دوشمنیم گولور.
اؤلن سئوگیمیزه یازیغیم گلیر،
حئیف او سئوگی‌یه، او محبّته.

سولطانلیق تاختیمیز دئوریلدی نئجه،
کولکسیز، توفانسیز سوورولدو هئچه.
او سئوگی نیفرته چئوریلدی نئجه،
حئیف او سئوگی‌یه، او محبّته.

سئوگی واردیر کی، دوداقلاردا آچار گوللرینی،
سئوگی واردیر کی، بیر آز قار کیمی، روزگار کیمیدیر.
سئوگی واردیر اوخودور قلبیده بولبوللرینی،
بؤیله بیر سئوگی منیم روحومو اوخشار کیمیدیر.

سئوگی واردیر کی، اوزاقدان بیزه پارلاق گؤرونور،
اونا یاخلاشمایالیم، چونکی او ظولمتله دولو.
سئوگی واردیر کی، دوشر یئرلره دایم سورونور،
اؤیله بیر سئوگی ده مین دورلو خیالتله دولو.
سئوگی واردیر کی، باهاردان بیزه گوللر گتیریر
ایچی زققوم و زهر، قوخلاما، قلبین قانایار.
سئوگی واردیر اوزو خوش، داخیلی بیر قورخولو یار.

سئوگی واردیر بیزه چوخ دادلی عمل‌لر گتیریر،
فقط هپسینده قارانلیق گئجه‌لر کؤلگه‌سی وار.
سئوگیلرده قاریشیق بیلمه‌جه‌لر کؤلگه‌سی وار.

شبنملرله بویالی آغ گول دردیم بیر ییغین،
گؤردوم گولده عطرین وار، شبنملرده ایشیغین.

دویدوم سنین سسینی سحر اسن نسیمده،
سنده اولان آتشدن روحومدا وار منیم ده.

رؤیالاردا پاریلدار گئجه گؤزل گؤزلرین،
توزلو زامان یولوندان گئتمز آیاق ایزلرین.

«یارادیجی» نقشینده سندن ایلهام آلمیشدیر،
پرده‌سینده باهارین رنگلری قالمیشدیر.

گؤزللیگی دونیادا سنسن گؤزل یارادان،
قندیللرده شؤعله‌سن، معبدلرده سیجوردان.

افسانه‌لر دؤوروندن سندن قالمیش هئیکللر،
سنی سئون شاعیرلر هله گزر دربه‌در.

سن بیر نوری ازلسن، گؤیدن یئره ایلندین،
ایلک اسرارین یولوندان، گلن یولچو سن ایدین.

نه بیلیدیک بو سئوگینین سونو یوخ،
نه بیلیدیک دونیا بئله دؤنه‌جک.
نه بیلیدیک سئوگی آدلی بو قوناق
ایکیمیزین آرامیزدا اؤله‌جک...

اولو سئوگی گؤی‌دن یئره ائندی‌می،
نه دایان‌دی یولوموزون اوستون‌ده؟
بو محبّت سویودوقجا سن دئمه
جان وئررمیش قولوموزون اوستون‌ده.

هر گؤروشه سورونوردو آیاقلار...
او چمنلر – بیر باهارلیق سمنی.
دوداقلاری یاندیران‌دا دوداقلار
اورییمیز اوشویورموش دئمه‌لی.

ایلنجه‌لر قویمادی کی گؤز آچاق؛
هر ایستیی بیز بئله‌جه بیتیردیک.
پاییز گل‌دی توی-بایراملا، بیز آنجاق
یارپاق-یارپاق گونوموزو ایتیردیک.

شیرین اولدو یالانلارین زهری،
حقیقتی گیزلمیشیک همیشه.
سئوگی‌لیلر اویاق آچدی سحری.
بیز آخشامی گؤزلمیشیک همیشه...

یوخو گؤردوک... گاه قورخولو، گاه دا شن،
بوغ‌دو بیزی ترددودولر آخاری.
یوخولاردا اللر گؤردوک بیرلشن،
نه یوزدوق‌سا هیجران اولدو آخیری...

نه بیلیدیک بو سئوگینین سونو یوخ،
نه بیلیدیک دونیا بئله دؤنه‌جک.
نه بیلیدیک سئوگی آدلی بو قوناق
اوزوموزه باخا-باخا اؤل‌جک...

سن دئمه تزه‌دن سئومک اولارمیش،
طالع ده تزه‌دن گوله بیلرمیش،
کوسوب گؤزویاش‌لی گئدن محبّت
پئشیمان-پئشیمان دؤنه بیلرمیش.

اورک بولود کیمی بوشالیرسا دا
دئمک بولود کیمی تزه‌دن دولور.
سونونجو شعله‌سی تیترین شمع‌دن
آیری بیر شمعی ده یان‌دیرماق اولور.

سن دئمه تزه‌دن سئومک اولارمیش،
کؤهنه یارالاری واخت، زامان سیلیر،
کسیلن بوداقلا اؤلن آغاجلار
تزه پؤهره‌لرله دیریله بیلیر.

آغلایا-آغلایا دونیایا گلیب
بیز آنا سودویله گولممیشیک‌می؟!
هر آخشام ساپساری باتان گونشی
هر سحر تزه-تر گؤرممیشیک‌می؟

سن دئمه تزه‌دن سئومک اولارمیش،
سئوگی فورصت دئییل قوش کیمی اوچا.
نه ده کؤلگه‌دیر کی،
قاچاسان قووا،
یا دا سن قوواسان
او سن‌دن قاچا...

چیخارسان قلبین‌دن اؤتن سئوگینی،
بیر گون ده تنهالیق سیخاجاق سنی.
کیمه‌سه ائتدیین یاخشی‌لیق کیمی
محبّت قارشینا چیخاجاق سنین.

ایلک سئوگی یووادان دوشن قوشجوغاز،
کؤرپه قانادلاری پؤهرلنمه‌ییب.
مجنونون آهییلا اوچان محبّت
مین حیله الیله یئره ائنمه‌ییب...

من کی گؤرممیشم سئوگینی سوسان،
محبّت زیروه‌ده بسلنن قارمیش.
کیم دئییر بیر دفعه سئویلیر اینسان،
سن دئمه هر زامان سئومک اولارمیش...

نه قدر عشقیمیز، ای گول، بئله پنهان اولاجاق؟
آشکار ائیله‌مه‌یینجه اورگیم قان اولاجاق
نه قدر اوزونون حسرتین عاشیق چکسین
نه زامان وصلینه بس یئتمگه ایمکان اولاجاق؟
بس هاچان رحم ائده جک بولبول بیچاره یه گول
نه قدر بس او فقیرین ایشی افغان اولاجاق؟
عشقدن باشقا نه درد اولسا، یئنه چاره سی وار
آیریلیق دردینه، بیلمم، نئجه درمان اولاجاق
اؤز خوشوملا او قارا زولفه اسیر اولدوم اؤزوم
بیلمه دیم، خاطیریم عشقینده پریشان اولاجاق؟!
سن گؤتور مسجیدی، زاهید، بیزه میخانه نی وئر
کیم بو ایشده گؤرک آخیردا پشیمان اولاجاق؟!
هله، واحد، مئیه میل ائیلمه، قوی گَلسین او گول
یارسیز یئرده مئی ایچمک بیزه نقصان اولاجاق

اولدوز سایاراق گوزله‌میشم هر گئجه یاری
گئج گلمه ده دیر یار، یئنه اولموش گئجه، یاری
گوزلر آسیلی، یوخ نه قارالتی، نه ده بیر سس
باتمیش قولاغیم، گور نه دوشورمکده‌دی داری
بیر قوش «آییغام!» سویلیه رک، گاهدان اییلدر
گاهدان اونو دا یئل دئیه لای- لای هوش آپاری
یاتمیش هامی، بیر آللاه اویاقدیر، داها بیر من
مندن آشاغی کیمسه یوخ، اوندان دا یوخاری
قورخوم بودی یار گلمه یه، بیردن یاریلا صبح
باغریم یاریلار، صبحوم آچیلما، سنی تاری!
دان اولدوزو ایستر چیخا، گوز یالواری چیخما
او چیخماسادا، اولدوزومون یوخدی چیخاری
گلمز، تانیرام بختیمی، ایندی آغارار صبح
قاش بئیله آغاردیقجا، داها باش دا آغاری
عشقین کی قراریندا وفا اولمایاجاقمیش
بیلمم کی طبیعت نیه قویموش بو قراری؟
سانکی خوروزون سون بانی، خنجردی سوخولدی
سینه مده اورک وارسا، کسیب قیردی داماری
ریشخندله قیرجاندی سحر، سویله دی: دورما
جان قورخوسی وار هر کیم اوتوزموش بو قوماری
اولدوم قره گون، آیریلالی او ساری تئلدن
بونجا قارا گونلردی ائدن رنگیمی ساری
گوز یاشلاری هر یئردن آخارسا، منی توشلار
دریایه باخار، بللی دی، چایلارین آخاری
از بس منی یاپراق کیمی هجرانلا سارالدیب
باخسان اوزونه سانکی قیزیل گولدی، قیزاری
محراب شفقده ئوزومی سجده ده گوردوم
قان ایچره غمیم یوخ، اوزوم اولسون سنه ساری
عشقی وار ایدی «شهریار»ین گوللی- چیچکلی
افسوس، قارا یل اسدی، خزان اولدی بهاری