اول یوسف گمگشته فراغیندا بو سیّد

تا مندن ایراق اول بت گول پیرهن اولدو،
هر جامه کی گئیدیم، منه غمدن کفن اولدو.
سن بئیله دئگیلدین منه، ای روح روانیم،
معلوم اولور کیم، سنی بیر اؤگره دن اولدو.
رهبر دئدیگیم اولدو منه راهزن آخر،
یوسف گؤرونن یار منه اهریمن اولدو.
بحرینه دؤنوب موج بلادن ایکی چشمیم،
هر قطره کی، دوشدو یئره دور عدن اولدو.
دیل ائیله‌دی آخر سر زلفونده نشیمن،
ایمانه گلیب مایل حب وطن اولدو.
نصف روخونو خط سیه توتدو او ماهین،
گلدی حمل له مهر، شب و روز تن اولدو.
اول یوسف گمگشته فراغیندا بو سیّد،
یعقوبه دؤنوب ساکین بیت الحزن اولدو.