منو
مشهدی کاظم بئی یه
مشهدی کاظم بئی یه
مشهدی کاظم بئی، ای سَرخۀ ارباب سخا
کیم، ائدیب دیر همتین چاکرلییه مرهون منی.
خاطریم هر گونده بیر احسانوون مرهونودور،
درک ائدر هر گونده بیر الطاف گوناگون منی
گرچی بی چیزم، ولی سیمرغ قاف همتم،
ائیله‌ییب دیر پرشکسته چرخ بوقلمون* منی.
صاحبا، خمخانۀ چرخ ایچره من گمنام ایکن
ائیله‌ییب دیر همتین عالمده افلاتون منی.
نور شمس شفقتیندن آی کیمی بدر اولموشام،
گرچی دؤور چرخ دون ائتمیشدی کل اورجون منی.
قوبّۀ افلاکه یئتمیش اوج رفعتدن باشیم،
ائیله دلشادم کی، توتماز فخردن هامون منی.
خاصه، ای سرور، آغا سیّد علی نین همتی
ائیله‌ییب گویا کی، سلطان بیلاساغون منی.
لیلی یه سرّ حقیقت دیر او ثبت مصطفی
کیم، ائدیب حسن خصالی دهر آرا مجنون منی.
حق اونو خوشحال قیلسین، عمرون افزون ائیله سین
کیم، ائدیب خوشحال او مولا حدی دن افزون منی.
اولموش ایدیم ائیله چرک معصیتدن مندرس
کیم، دخی پاک ائیله مزدی اللی پود صابون منی.
من او شخص ایدیم کی، مندن نفرت ائیلردی جاهان،
سؤیلیردی پاک لر ناپاک و بل ملعون منی.
شکرلله اولموشام تا کیم، ثناخوان حسین،
ائیله‌ییب خوشبخت عالم ایزد بی چون منی.
راندۀ درگاه ایکن اوسیاتی ایله ابلیس تک،
بخت خوش فرجام ائدیب بو دولته مقرون منی.
سیز بو ایل همت قیلیب مسجیده اقدام ائیله دیز،
ائتمه یه تا خلعت و انعام ایله ممنون منی.
خلعتی تبدیل قیلدیز پولا، ای صاحب کرم،
بؤیله فکر ائتدیم کی، بو کس لر ائدر قارون منی.
اؤزلرین آلتی یازانلار وئردی آخر اوچ مانات،
بعضی لر کیم، وئرمه‌ییب هئچ، ائتدی لر دل خون منی.
رابئیندن “کلبهوم” رمزیله کئچمک یاخشیدیر،
اینجیدیب بو امرده بو اوچ نفر ملعون منی.
بوندان اقدم من ائله ناپاک ایدیم کیم، هجوده
ائیله مزدی پاک هرگز قولزوم و جیحون منی.
طبع مضون کیم، منه بیر مرحمت دیر حق دن،
رشک دن ضمرا ائیله یر بیر پاره نامضون منی.
روح قدسی دن منه امداد اولور وقت سخن،
ائیله سه عاجز اگر ناگاه بیر مضمون منی.
صبر اؤولا دیر، هله قالسین بو نقل و ماجرا،
تا گؤرک ناشاد ائدیر، یا شاد ائدیر گردون منی؟
اونلارین اوصافیم اول وقت اظهار ائیلرم
کیم، گتیرسین بیر دماغه بادۀ گولگون منی.
مختصر سؤز، صاحبا، بو ایشده مغبون اولموشام،
ائیله‌ییب لر مکرایله ملعون لر مغمون منی.
کسمه سین حق سایه نی هرگز باشیندان سیّدین،
اولما راضی کیم، ائده دور فلاک محضون منی.
——————————
* بوقه لمون