گؤوهر سیراب قؤوسی ایستر ایسن دهرده

ناله ایله سیزلارام هرگاه موسیقار تک،
چنگ سیز آهنگ گردون شیون ائیلر تار تک.
بیر سؤز ایله نالۀ مظلوما وئرمزلر جاواب،
کاش اولایدی باغری سنگیندیل لرین کوهسار تک.
نقطۀ خالین تاماشاسیندا ای گؤز مردومی،
دورموشام بیر یئرده و سرگشته یم پرگار تک.
ائیلرم، زاهید، عبادت روضۀ رضوان اوچون،
بیر نهالی وار ایسه اول سرو خوشرفتار تک.
اؤز دیارین دان کؤنول لر مولکو بس هردم نئچون،
چال و چاپ ائیلر خیالین یاغی خونخوار تک.
محو اولور خورشید روخسار عرق ناکین گؤروب،
مردوم چشمیمله اشکیم ثابت و سیّار تک.
گؤوهر سیراب قؤوسی ایستر ایسن دهرده،
هر خس و خاشاکه قاتلان بحر لنگردار تک.