صدف غلتان هم اولسا، گؤوهر غلتان یئرین توتماز

اولور هرچند جان شیرین، ولی جانان یئرین توتماز،
بیر-ایکی اوچ نفس بیر عؤمر جاویدان یئرین توتماز.
منی بولبول لر ایله بیر توتان بیدرد بیلمزمی –
کی، یوز مین بولهوس بیر عاشیق حیران یئرین توتماز.
مئی گولگون، شب هیجران نه کیفیت وئریر، ساقی –
کی، سنسیز چشمۀ حیوان بیر اووج قان یئرین توتماز.
اگر یوز مین خیابان شاخ گول سبز اولسا گولشنده،
بیری، ای باغبان، اول سرو خوش جؤولان یئرین توتماز.
نه حاصل محنت آرتیرماق، نه لازیم دردسر چکمک،
طبیب، اول درد بیدرمان مگر درمان یئرین توتماز.
کؤنول هرچند عالی قدر اولورسا، مهرین اعلا دیر،
صدف غلتان هم اولسا، گؤوهر غلتان یئرین توتماز.
سنه ارزانی قؤوسی آغیز آچماق، گولمک، آچیلماق –
کی، یوز مرهم منیم زخمیمده بیر پیکان یئرین توتماز.